Joost-hofgeding nie nodig, sê prokureur
2011-06-20 07:06
Johannesburg – Joost van der Westhuizen hoef nie aansoeke by die hof in te dien vir voldoende toegang tot sy kinders nie, omdat die huidige reëling in verband daarmee heeltemal voldoende is.
Só sê Claudio Bollo, prokureur van die sangeres Amor Vittone. Sy en Van der Westhuizen is besig met ’n egskeiding en die kinders is onder haar toesig geplaas.
Van der Westhuizen gaan vandeesweek hofstukke indien om meer toegang tot sy kinders te kry.
Bollo sê hy kan nie kommentaar lewer op hofstukke wat nog nie uitgereik en in sy besit is nie, maar hy beskou die bestaande toegang wat Van der Westhuizen, oud-Springbokkaptein, tot sy kinders het, as voldoende.
Robert Klinkenberg, Van der Westhuizen se prokureur, sê die hofstukke in verband met meer toegang tot sy kinders sal vandeesweek in die hooggeregshof uitgereik word.
“Ek verwag dat die saak binne twee weke op die hofrol geplaas sal word.
“Dit is nie ’n dringende aansoek nie, eerder ’n semi-dringende aansoek.
“Joost meen dat die huidige reëling nie voldoende is nie.
“Daarvolgens kry hy die kinders elke tweede naweek en mag hy hulle soms deur die week by die skool gaan haal om hulle huis toe te vat.
“Ons glo dat die tyd nou reg is dat ’n formele toegangsbevel deur ’n hof gemaak word sodat almal weet waar hulle staan.”
Die twee kinders het Sondag, Vadersdag, saam met Van der Westhuizen deurgebring.
Nie hy of Vittone het gereageer op stemposboodskappe op hul selfone om kommentaar te lewer nie.
Intussen het Bridget van Oerle, Van der Westhuizen se woordvoerder, Vrydag gesê ’n nuuskonferensie sal binnekort – moontlik vandeesweek nog – gehou word om die finale aankondiging oor Van der Westhuizen se siekte te doen. Aanvanklik is aangekondig dat hy motorneuronsiekte het, maar intussen het ’n tweede neuroloog volledige toetse op hom gedoen. Dit is dié bevindinge wat op die konferensie bekend gemaak sal word.
Klinkenberg sê die mediese advies wat hy gekry het, is dat Van der Westhuizen heeltemal in staat is om ’n motor te bestuur en om na die kinders om te sien terwyl hulle in sy sorg is.
Volg Nuus24 op Twitter
- Beeld