Joost het straks nié dodelike siekte
2011-05-21 07:07
Kaapstad. – Dit is nog hoegenaamd geen uitgemaakte saak dat Joost van der Westhuizen, oud-Springbokkaptein, die gevreesde en dalk fatale motorneuronsiekte het nie.
Dit blyk uit ’n verklaring wat dr. Jody Pearl, een van die dokters wat in die laaste dae intensiewe toetse op Van der Westhuizen gedoen het, Vrydagaand laat uitgereik het.
Van der Westhuizen is intussen ook uit die Sunninghill-hospitaal in Sandton ontslaan waar hy verlede Donderdag opgeneem is.
Verlede week het sy huisdokter en vriend, dr. Henry Kelbrick, ’n verklaring uitgereik dat hy motoneuronsiekte het en waarskynlik nie lank sal bly leef nie.
Pearl het egter gesê geen “finale diagnose” is nog gemaak nie.
Van der Westhuizen het verskeie toetse ondergaan en die siekte bly ’n moontlikheid, maar is nog nie bevestig nie, het hy gesê.
Versigtige mediese oorweging word vereis voor ’n finale diagnose gemaak kan word.
Volg Nuus24 op Twitter.
- Die Burger