Joost: “Ek het amper my lewe verloor”
2009-11-05 07:45
Thinus Ferreira
Johannesburg - “Ek het amper my lewe verloor.” En later: “Ek het hard op my gat geval.”
Só het ’n sigbaar afgetakelde Joost van der Westhuizen, gewese Springbok-rugbyspeler, gisteraand met die moegheid vlak hoorbaar in sy stem aan Coenie de Villiers op Kwêla op kykNET gesê.
Dit was Van der Westhuizen se eerste TV-onderhoud sedert hy verlede week erken het dit was wel hy in die berugte seksvideo wat in Februarie opslae gemaak het. Dié seksvideo het Van der Westhuizen en sy vrou, die sangeres Amor Vittone, se lewe die afgelope agt maande in ’n maalkolk gedompel.
“Dit was ’n baie rowwe week, maar dit was deur my eie toedoen. Dis ’n geveg wat ek moet veg met myself en ek sal anderkant uitkom.” Van der Westhuizen het gesê hy sit in die regstreekse onderhoud “in skaamte” en hy voel “verneder”.
“Ek vra om verskoning vir wat ek aan daai vrou en aan die mense gedoen het. Ek het hierdie boek geskryf aan my twee kinders. Ek kan nie verwag dat my twee kinders eerlik moet wees met my as ek nie eerlik is met hulle en hul ma nie.
“Dis die storie van ’n rugbyspeler – my storie – wat so beroemd geraak het dat jy later ’n valse lewe lei. Nou is dit ’n lewensles van ’n ou wat van sy troontjie gekom het omdat hy ’n leuen gelewe het.”
Van der Westhuizen het gesê: “Ek vra om vergifnis en om verskoning hier op Kwêla. Die goed waarvan ek nou beskuldig word, is my private lewe.
“Dit is wat ek moet uitsorteer met my vrou en my kinders en my Here. Ek speel nie die geloofkaart nie. Hierdie is my lewe en ek het verkeerd geleef. Ek wil regmaak.”
Hy verwag dat hy nog met baie klippe gegooi gaan word. Hy het bygevoeg dat hy oor die media “tweeledig” en “baie emosioneel voel”.
“Hierdie dinge het gebeur om my ’n beter mens en nie ’n bitter mens te maak nie. Ek wil ’n beter mens hier uitstap. Ek is ’n mens. Ek het foute gemaak. Ek is uitgevang. Nou moet ek regmaak. Daar is net een pad, en dit is die waarheid. My boodskap is eenvoudig: Moenie ’n leuen lewe nie.”
’n Ietwat skor Van der Westhuizen het byna emosioneel geraak toe hy oor sy vrou gepraat het.
“Sy is hierdie ongelooflike mens. Ek vra myself: Hoe kon jy dit gedoen het, Joost? Ek het hard op my gat geval.”
–Die Burger