Jonges is teen 'Tshwane'

2012-10-17 15:12

Johannesburg – Byna drie uit elke vyf jong Suid-Afrikaners glo dat Pretoria nie Tshwane genoem moet word nie, het ‘n meningspeiling getoon.

“Hierdie opname wys die kwessie van die verandering van stede se name, is ‘n omstrede een,” het Butch Rice van die verbruikersnavorsingsmaatskappy Pondering Panda gesê.

Altesaam 58% van die jeug voel Pretoria se naam moet onveranderd bly, terwyl 33% meen dit moet verander word. ‘n Totaal van 10% kon nie ‘n besluit neem nie.

Pondering Panda sê 3 451 respondente tussen die ouderdom van 18 en 34 van oor die land het aan die opname deelgeneem.

Ondersteuning vir die naam het tussen rassegroepe gewissel.

Terwyl 52% van jong, swart Suid-Afrikaners gevoel het Pretoria se naam moet dieselfde bly, wou 38% hê dit moet na Tshwane verander word.

Sowat vier uit vyf jong wittes, kleurlinge en Indiërs was teen die naamsverandering gekant.

In Gauteng het 57% van die respondente gevoel Pretoria se naam moet dieselfde bly, terwyl 73% van mense in die Wes-Kaap teen die verandering gekant was.

Volg Nuus24 op Twitter