Jong seun sterf toe hut afbrand
2013-01-19 13:39
Kaapstad – 'n Seun is dood en 32 mense is dakloos gelaat ná brande in informele nedersettings in Kaapstad, het 'n amptenaar van die stad Saterdag gesê.
Carlton-Lee Botha, 3, was volgens Wilfred Solomons-Johannes van die stad se rampbestuursentrum in 'n hut in Tafelsig, Mitchellsplain aan die slaap toe 'n brand omstreeks 08:00 Saterdag uitgebreek het.
Twee mense is dakloos gelaat.
Brande het in die vroeë oggendure ook deur informele nedersettings in Belhar, Strand, Mfuleni en Guguletu versprei.
Dié brande het volgens Solomons-Johannes 10 mense sonder 'n heenkome gelaat.
'n Brand het Vrydagaand ook vyf hutte by Potsdamstraat in Du Noon, Milnerton, in puin gelê, en 20 mense dakloos gelaat.
Geen beserings is aangemeld nie.
Diegene wat deur die brande geraak is, is van kospakkies, produkte vir die versorging van babas, klere en boumateriaal voorsien.
– Volg Nuus24 op Twitter.
- SAPA
