Jong man sterf op N1
2011-12-24 08:02
Vicus Bürger
Bloemfontein – ’n Jong man met Vrystaatse wortels is dood en sy vrou ernstig beseer in ’n grusame ongeluk op die N1 buite Bloemfontein toe hulle op pad na sy ouers was om Kersnaweek daar deur te bring.
Die vyf insittendes van die ander motor wat in die botsing betrokke was, is ook beseer.
Damian (23) en Helen Sykes (21) van Pretoria, wat skaars ’n jaar getroud is, het eergisteraand omstreeks 22:15 in hul Volkswagen Velociti teen ’n Volkswagen Polo op die N1 naby die vulstasie by Sunny Hill gebots.
Dit is nie seker hoe die ongeluk gebeur het nie.
Ao. Zweli Mohobeleli, polisiewoordvoerder, sê mnr. Sykes is op die ongelukstoneel dood.
Sy vrou is na die Mediclinic Bloemfontein gebring.
Mohobeleli sê die vyf insittendes van die Polo, onder wie ’n vierjarige meisie, is ook in die ongeluk beseer en na die Pelonomi-hospitaal in die stad gebring.
Hul name is nog nie bekend nie.
Die nooddiens ER24 en provinsiale ambulansdiens het beseerdes op die toneel behandel en na die hospitale vervoer.
André Visser, woordvoerder van ER24, sê reddingstoerusting moes gebruik word om beseerdes te bevry.
Die egpaar was op pad na Bloemfontein om by mnr. Sykes se ouers, Simon en Tina, te kom kuier.
Mnr. Sykes sr. was gister te hartseer om met Volksblad te praat.
Die jong man het nog eergister op sy Facebook-profiel geskryf: “bloemtown here we come. Gna chill der for t week.”
Sy skoonpa, Nicky Haddad van die plaas Howie in die Clocolan-distrik, het gister gesê sy skoonseun was ’n “mooi mens met ’n wonderlike familie”.
Die tragiese ongeluk so kort voor Kersfees is ’n geweldige skok vir die familie. Hy het gesê sy dogter word onder sterk verdowing gehou en hy is nie seker of sy weet haar man is dood nie.
Mev. Sykes het verskeie snywonde opgedoen en is in ’n stabiele toestand in die Mediclinic se intensiewe-sorgeenheid. Sy is ’n grafiese kunstenaar. Haar man was ’n siviele ingenieur in Gauteng.
Die egpaar het saam aan die Sentrale Universiteit vir Tegnologie (SUT) in Bloemfontein studeer.
Mev. Sykes se ma, Annette Haddad, is van haar pa geskei en woon ook in Bloemfontein.
- Volksblad