Jong man by kuierplek papgeslaan
2011-11-29 08:00
Bloemfontein – Die pa van ’n jong Bloemfonteiner, wat vermoedelik in die stad aangerand en bebloed agtergelaat is, is op soek na sy seun se aanvallers.
FC Marx (18) is Sondag in die vroeë oggendure langs Dirk Oppermanstraat in Langehovenpark bewusteloos en in ’n ernstige toestand gevind.
’n Vrou, wat verkies om anoniem te bly, sê haar seun het op hom afgekom.
“Hy was (volgens haar seun) kwaai bebloed.”
Haar seun het vermoed hy is geslaan en het die nooddienste ontbied. Hy kon glad nie praat nie.
Marx is na die Bloemfontein Mediclinic gebring.
Volksblad het in ’n ondersoek vasgestel hy was vroeër die nag by die Wild Boar-kuierplek oorkant die plek waar hy gevind is.
Frank van den Berg, eienaar van dié kuierplek, het videomateriaal wat in die nag deur veiligheidskameras opgeneem is, aan ’n joernalis gewys.
Marx, skynbaar gedisoriënteerd, het Sondagoggend net ná middernag die kuierplek binnegekom. Van den Berg sê dit wil voorkom asof hy vir iemand weggehardloop het.
Kort daarna het personeel hom uit Wild Boar verwyder.
Van den Berg sê die jong man het volgens ooggetuies ’n vrou, wat in beheer van die kuierplek se skoonmakers is, by die ingang in die gesig gestamp.
Op die videomateriaal kan ’n mens sien hoe sy hom buite die kuierplek klap nadat hy uitgesleep is.
Later staan hy op en hardloop weg waarna hy vermoedelik aangerand is.
Volgens die eienaar is dit nie seker of Marx vroeër die aand hier gekuier het nie.
Sy pa, Tommie, het gesê hy gaan uitvind wie sy seun geslaan het. Die jong man se ouers wou nie volledig kommentaar lewer nie.
Amanda Appelgryn, woordvoerder van die Bloemfontein Mediclinic, sê Marx het sagte weefselbeserings (soos kneusplekke) opgedoen, maar niks gebreek nie.
Kapt. Chaka Marope, polisiewoordvoerder, het gister gesê ’n klag oor dié vermoedelike aanranding is nog nie by die polisie ingedien nie.
Marx was vroeër in die nuus nadat hy in ’n rugbyoefening by sy skool inmekaargesak het.
Volg Nuus24 op Twitter
- Volksblad