Jong Samaritane glo deur polisie aangerand
2011-05-03 08:57
Stellenbosch - Drie jong mans van Somerset-Wes is glo ure lank deur polisielede van die Stellenbosch-polisie geklap, gevloek en gedreig nadat hulle vroeër die aand ’n man wou help wat glo deur twee ander jong mans aangerand is.
Wiann Groenewald (18), ’n student aan die Boland-kollege, Jacques Geldenhuis (18), ’n student in Engeland, en Werner Wessels (18), ’n amateur-gholfspeler, het Saterdagoggend drie klagte van aanranding teen lede van die Stellenbosch-polisie ingedien.
Hulle sal Dinsdag in die plaaslike landdroshof verskyn op klagte van verset teen inhegtenisneming en die verhindering van polisiebeamptes in die uitvoering van hul pligte.
Kapt. René Matthee, Stellenbosch se polisiewoordvoerder, het bevestig dat die drie in hegtenis geneem is en dat ’n klag van aanranding teen polisielede op 30 April by die polisiekantoor ingedien is.
“Ons ondersoek albei voorvalle,” het sy gesê.
In die betrokkenes se beëdigde verklarings verduidelik elkeen die gebeure van 29 April wat gelei het tot wat hulle beskou as polisie-brutaliteit en hul inhegtenisnemings.
Francois van Wyk (19), ’n vriend van die drie wat ook ten tyde van die voorval by was, het ’n verklaring as ooggetuie ingedien.
Luidens al vier verklarings het die jong mans Vrydag omstreeks 23:00 in Birdstraat in die rigting van die Dros-restaurant gestap.
Oorkant die kuierplek Die Lapa, het die vier gesien hoe ’n “jong, wit man” besig was om “’n ouer, grys, bruin man met ’n snor” te slaan.
Hulle het die ou man te hulp gesnel.
Volgens Wessels se verklaring het twee polisievangwaens in daardie stadium verbygery en gestop.
“Daar was ongeveer ses polisielede. Twee polisiemanne het Jacques hardhandig gegryp, sy kop baie hard teen die vangwa gestamp en hom agter in die vangwa gestoot terwyl hulle sy kop hard teen die deur van die voertuig gestamp het.”
Drie van die vier jong mans is glo “hardhandig” in die vangwa gelaai en na die polisiekantoor gebring.
By die polisiekantoor is hulle glo hard in die gesig geklap en gevloek. “Vier van die polisiemanne het ons die hele aand voortdurend toegesnou: ‘Julle wit boerseuns kom net k*k maak in ons dorp.’”
Hulle is om 03:00 vrygelaat, waarna ’n polisieman glo aan Wessels gesê het: “Julle moet verstaan as ons rassisties is.”
- Volksblad