Johannesburg gaan sink, geboue kantel
2010-07-30 08:15
Johannesburg - Johannesburg sit op ’n tydbom.
Die mynwater onder die stad moet “baie vinnig” uitgepomp word anders gaan Johannesburg “sink”.
So het Gareth Morgan, DA-woordvoerder oor waterwese, gister ná afloop van ’n driedaagse besoek aan waterryke myngebiede aan die Witwatersrand gesê.
Morgan het gesê “burokrasie” en “’n gevoeteslepery” tussen die departemente van mynbou en waterwese gaan ’n “groot omgewingskrisis” aan die Witwatersrand en veral in die sentrale deel van Johannesburg veroorsaak.
Hy het daarop gewys dat dieselfde omgewingsramp wat die Wes-Rand in Januarie getref het toe meer as 70 miljoen liter suur mynwater by ’n ou ventilasieskag begin uitborrel het, Johannesburg se voorland is as die regering nie nou aan die werk spring om pompe te bou sodat die ondergrondse water uitgepomp kan word nie.
Mariette Liefferink, omgewingsaktivis, het verlede week aan die portefeuljekomitee oor waterwese gesê die water in die uitgemynde dolomitiese kom waarop Johannesburg gebou is, is 560 m van die oppervlak af.
Marius Keet, adjunkdirekteur van watergehaltebestuur by die departement, het by dieselfde geleentheid bygevoeg die water styg daagliks met byna ’n meter.
Die verwagting is dat die suur mynwater oor 18 maande (vroeg in 2012) op verskeie plekke in die sentrale deel van Johannesburg kan begin uitborrel.
Volgens Morgan is daar ook bewyse dat die suur mynwater, as dit ’n sekere vlak bereik het, hoë geboue onstabiel kan maak.
“Daar is dus nie meer tyd nie. Die regering sal onmiddellik moet optree om planne in werking te kry,” het hy gesê.
Volgens Keet is daar “planne” vir infrastruktuur op die tafel, maar die regering gaan onmiddellik R220 miljoen daarvoor nodig hê.
Morgan het bygevoeg hy is geskok oor wat hy die afgelope drie dae gesien het.
“Aan die Wes-Rand loop miljoene liter suur mynwater in die Tweelopiespruit en by Grootvlei word besoedelde mynwater in die Blesbokspruit gepomp.”
Hy het gesê die regering kan nie net pompe bou en die water onder die stad uitpomp nie.
“Dis suur mynwater daardie. Dit sal skoongemaak moet word voordat dit in riviere gestort word.
“Die DA meen dié is ’n noodsituasie waarvoor onmiddellik oplossings gevind moet word.”
H20 styg toe myn sluit
* Die water in die sentrale kom het begin styg nadat die land se oudste myn, ERPM, twee jaar gelede sy deure gesluit en die pompe afgeskakel het.
* Aan die Wes-Rand pomp Rand Uranium nog daagliks 12,5 miljoen liter van die 19,5 miljoen liter water wat uit die ventilasieskag uitborrel.
* By Grootvlei aan die Oos-Rand pomp Aurora 108 miljoen liter mynwater uit die ondergrondse oostelike kom, maar suiwer dit nie en stort dit net so in die Blesbokspruit.
- Beeld