Joernalis vas vir bedrog
2010-08-04 13:11
Johannesburg – ‘n Joernalis van die koerant Sunday Times is Woensdag in hegtenis geneem weens bedrog en dwarsboming van die gereg.
Musa Zondi, woordvoerder vir die polisie se elite-misdaadeenheid die Valke, het bevestig dat die joernalis in hegtenis geneem is. Hy sal binne 48 uur in die hof verskyn.
Zondi wou nie die joernalis se naam of besonderhede oor die klagtes teen hom bekend maak nie.
“Julle sal meer te wete kom as sy saak voor die hof verskyn,” het hy gesê.
Intussen het The Daily Maverick berig dat die joernalis, Mzilikazi wa Afrika, in hegtenis geneem is weens ‘n vervalste bedankingsbrief van die premier van Mpumalanga.
Wa Afrika was een van die joernaliste wat verlede week se berig in die Sunday Times rakende die polisie se nuwe hoofkantoor in die Pretoriase middestad, geskryf het.
Genl. Bheki Cele, nasionale polisiehoof, het uitgevaar teen hierdie ‘onakkurate beriggewing’.
- SAPA