Joernalis maak 2010-bomdreigement
2009-12-04 14:46
Kaapstad – Die polisie en snuffelhonde is Vrydag na die Kaapstadse Internasionale Konferensiesentrum ontbied nadat ‘n joernalis glo ‘n vals bomdreigement gemaak het.
Dié voorval het plaasgevind terwyl die laaste voorbereidings vir die loting, wat 19:00 uitgesaai sal word, besig was om plaas te vind.
Die gebou is ontruim en plofstof-deskundiges was op die perseel. Al die ingange van die sentrum was ook afgekamp terwyl die polisie die gebou gefynkam het vir enige plofstoftoestelle.
“Ons het omstreeks 12:45 ‘n vals bomdreigement vanaf ‘n buitelandse joernalis ontvang wat beweer het dat hy ‘n bom in sy sak gehad het,” het Vishnu Naidoo, polisiewoordvoerder, gesê.
“Hy het sy sak laat val en probeer vlug maar is deur owerhede vasgekeer. Hy staar nou moontlike tronkstraf in die gesig.”
Naidoo het bevestig dat daar vroeër die dag twee bomdreigement by die Kaapstadse Internasionale Lughawe was.
Twee verdagtes is reeds in verband met hierdie dreigemente in hegtenis geneem.
Die sekuriteit in Kaapstad is opgeskerp veral omdat bekendes van oor die hele wêreld Vrydagaand met besoek aan Kaapstad sal wees.
–Sapa, AFP