Joernalis bedank oor Ramaphosa-storie

2012-12-18 11:19

Johannesburg – 'n Politieke redakteur van die Independent-koerantgroep het bedank ná 'n berig in The Star dat die sakeman Cyril Ramaphosa 'n benoeming vir adjunkpresident van die ANC geweier het.

"Ek het nie gehelp om die storie te skryf nie," het Gaye Davis Dinsdag gesê.

"Ek het egter Sondagaand inligting van mnr. Ramaphosa ontvang – wat die teendeel is van wat die berig sê. Hy het sy benoeming aanvaar en 'n vorm onderteken," het sy in 'n verklaring aan Sapa gesê.

Davis het bedank om haar te distansieer van The Star se berig.

"Eties glo ek nie ek kan myself distansieer van die storie terwyl ek in diens is van die Independent-koerantgroep nie," het sy gesê.

Sy glo dit is nodig om te bedank om haar geloofwaardigheid as joernalis te beskerm.

Davis het aan die skrywer van die berig gesê Ramaphosa het bevestig dat hy die benoeming gaan aanvaar, maar daar is aan haar gesê The Star staan by hul storie. Daar is ook gesê ander redakteurs in die groep kan hul eie oordeel maak.

"Ek het met die ander oggendredakteurs van die groep gekommunikeer, wat die nodige stappe gedoen het en nie die storie in sy oorspronklike vorm gepubliseer het nie."

Tony Howard, hoof- uitvoerende beampte van die groep, het gesê hy het pas van die bedanking uitgevind en kan nie kommentaar lewer nie.

Davis is sedert Oktober 2008 die adjunk-politieke redakteur van die groep. Sy het gesê sy het Ramaphosa gekontak en hom in kennis gestel van haar besluit om te bedank.
      
– Volg Nuus24 op Twitter

- SAPA