Jhb-raadslede skuld tot R1 m.
2012-01-28 07:06
Johannesburg – Lede van die Johannesburgse metroraad het die stad teen die einde van die 2010-’11-boekjaar byna R1 miljoen geskuld.
Luidens die stadsraad se finansiële verslag vir dié tydperk wat Donderdag ter tafel gelê is, was 64 raadslede (byna ’n kwart van die raad) agterstallig met hul betalings.
Onder hulle is Chris Vondo, burgemeesterskomiteelid vir ekonomiese ontwikkeling, en Mmusi Maimane, die DA se nasionale woordvoerder en koukusleier in die raad.
Die groep se rekeninge was in die 2010-’11-boekjaar vir meer as 90 dae agterstallig.
Die twee raadslede wat luidens die verslag die meeste geskuld het, is Daniel Netnow, DA-raadslid vir wyk 7 (Ennerdale en Lenasia-Suid), en David Dewes, DA-raadslid vir wyk 70 (Florida).
Netnow het aan die einde van die boekjaar R307 084 geskuld en Dewes R124 881.
Patrick Atkinson, DA-raadslid en -woordvoerder oor munisipale finansies, het gesê die styging in die skuldbedrag is gedeeltelik weens die diensterekeningkrisis in Johannesburg.
“Sommige van die raadslede maak hulle wel skuldig aan laat betaling, maar ander word soos die res van Johannesburg se inwoners deur rekeningprobleme geteister.”
Maimane, wat R3 789 agterstallig was, het gesê hy is kort voor die einde van daardie boekjaar verkies en het probleme met die oordrag van ’n rekening gehad.
Sy water- en kragtoevoer is aan die einde van verlede jaar afgesny ná eindelose probleme om te bewys die bedrag is wel vereffen.
“As ek vandag ’n rekening wou open, sal ek net soveel probleme hê.”
Netnow het gesê hy worstel al maande om sy rekening reg te stel.
“Soos baie inwoners sit ek met ’n reusagtige rekening wat ek sukkel om reg te stel. Dit is ’n probleem met die waterlesings en ek het dit al verskeie kere aangemeld.”
Dewes en Vondo, wat R1 706 geskuld het, was nie gister vir kommentaar beskikbaar nie.
– Volg Nuus24 op Twitter
- Beeld