Jeugliga verkla Kaapse burgemeester
2010-06-08 10:05
Die Burger
Kaapstad – Die ANC-jeugliga het strafregtelike klagte teen die burgemeester van Kaapstad, mnr. Dan Plato, by die polisie ingedien te midde van die voortslepende toiletsage in Khayelitsha.
Klagte van opsetlike saakbeskadiging en aanhitsing tot geweld is by die Khayelitsha-polisiekantoor teen Plato ingedien.
Plato wou nie kommentaar lewer oor die klagte nie.
Die klagte is die jongste wending in die toiletsage nadat die Menseregtekommissie (MRK) Vrydag bevind het die Kaapse stadsraad het die regte van inwoners geskend deur nie behoorlik toegeboude toilette te verskaf nie.
Die ANC het gister die MRK se bevindinge verwelkom.
“Die uitspraak beklemtoon wat ons die heeltyd gesê het,” het mnr. Ishmail Mnisi, ANC-woordvoerder, in ’n verklaring gesê.
Die MRK het sy bevinding oor die voortslepende toiletsage deur middel van ’n persverklaring bekend gemaak.
Luidens die verklaring het die kommissie aanbeveel dat die DA-stadsregering die 51 toilette wat amptenare verlede Maandag in Makhaza, Khayelitsha afgebreek het weer installeer en dat alle toilette met bakstene en sement toegebou moet word.
Die Kaapse stadsraad het in 2007 begin om een toilet vir elke huishouding in Khayelitsha op te rig op voorwaarde dat inwoners dit self sou toemaak. Dié reëling sou glo verseker dat die stadsraad meer geld sal hê om ’n toilet vir elke huishouding op te rig.
Die MRK het egter bevind dat die proses van oorlegpleging met inwoners nie voldoende was nie.
Daar word ook aanbeveel dat die departemente van waterwese en menslike nedersettings meer betrokke raak by die uitwissing van die emmerstelsel en oop toilette.
Mnr. Shicelo Shiceka, minister van samewerkende regering en tradisionele sake, beoog om inwoners van Makhaza vandeesweek te besoek om hul griewe oor sanitasiegeriewe aan te hoor.
) Die sinkplaat-afskortings by die toilette is deur die Kaapse stadsraad opgerig. Die raad is erg veroordeel oor die toilette wat aanvanklik nie mure gehad het nie en toe later met die sinkplaatmure toegemaak is.
Dit is gedoen ingevolge ’n ooreenkoms met die inwoners van Makhaza dat elke huishouding ’n toilet sou kry, maar omdat dit nie binne die begroting van die projek gepas het nie, het inwoners ingestem om self hul toilette toe te bou.
Die enkele toilette wat net so oop gelos is, is deur die ANC-jeugliga as ’n teken gesien dat die stadsraad nie omgee vir arm mense in townships nie.
Volg Nuus24 op Twitter