Jeugligaleiers se aansoek om appèl gou ingehandig
2011-11-24 10:14
Johannesburg – Regsverteenwoordigers van die geskorste ANC-jeugliga-leiers sal hul aansoek om appèl by die ANC se nasionale appèlkomitee indien, het Sowetan berig.
Julius Malema, omstrede leier van die jeugliga (ANCYL), Floyd Shivambu, woordvoerder van ANCYL, Ronald Lamola, adjunkleier van die jeugliga, Sindiso Magaqa, sekretaris-generaal, Kenetswe Mosenogi, adjunk-sekretaris-generaal, en Pule Mabe, tesourier-generaal, is skuldig bevind en twee weke gelede deur die ANC se nasionale tugkomitee (NTK) geskors.
Malema is skuldig bevind op aanklag dat hy verdeeldheid saai in die ANC nadat hy gesê het die Afrika-unie (AU) en die Suider-Afrikaanse Ontwikkelingsgemeenskap (SAOG) is van koers af sedert oudpres. Thabo Mbeki nie meer staatshoof is nie.
Hy is ook skuldig bevind op aanklag dat hy die regerende party in oneer bring oor sy uitlatings oor Botswana.
Malema en die ander geskorste leiers is daarvan skuldig bevind dat hulle ongenooid by 'n vergadering van die ANC opgedaag en dié vergadering ontwrig het.
Die omstrede leier is vyf jaar uit die party geskors en beveel om sy posisie as leier van die ANCYL te verlaat. Shivambu is vir drie jaar geskors.
Die ander vier leiers vir elkeen vir twee jaar geskors. Die skorsing is opgeskort vir 'n tydperk van drie jaar.
Die jeugliga sal na verwagting argumenteer dat hy onafhanklik van die ANC is en dat die NTK op die liga se “ou” grondwet staat gemaak het toe die vonnisse opgelê is.
Volg Nuus24 op Twitter
- SAPA