Jeugliga 'sal vir optog-skade opdok'
2011-10-26 07:03
Maryna Louw en Jacques Steenkamp
Johannesburg – Die ANC-jeugliga het ’n ooreenkoms met die Johannesburgse Metropolisie (JMPD) onderteken dat hulle vir enige skade weens Donderdag se massa-optog vir ekonomiese bevryding in Gauteng sal betaal.
Die JMPD het aanvanklik sekuriteitsversekering van R1 miljoen van die jeugliga geëis vir toestemming om die optog te hou ná die gewelddadige betogings buite Luthuli-huis in Johannesburg verlede maand tydens Julius Malema, ANC-jeugleier, se tugverhoor.
Die jeugliga het egter geweier om te betaal, waarna hulle as alternatief ’n ooreenkoms met die metropolisie onderteken het.
Insp. Edna Mamonyane, JMPD-woordvoerder, het Dinsdag gesê die jeugliga het gesê hulle het nie R1 miljoen nie, maar sal finansieel verantwoordelikheid aanvaar vir enige skade wat betogers aanrig.
Malema het Maandag op ’n mediakonferensie by Luthuli-huis gesê Johannesburg en Tshwane het elk R1 miljoen van die jeugliga geëis.
Sr.supt. Alta Fourie, woordvoerder van die Tshwane-metropolisie, het Dinsdag gesê dit is standaardprosedure om ’n betaling te eis vir toestemming om ’n optog te hou aangesien ’n spesiale diens deur die metropolisie gelewer word.
“Die fooi word bepaal deur die aantal beamptes wat nodig word vir die optog.”
Sy kon egter nie sê wat die bedrag is wat die Tshwane-metropolisie van die jeugliga geëis het nie.
Betogers kom Donderdagoggend om 10:00 by die Beyers Naudé-plein in die Johannesburgse middestad bymekaar van waar die optog begin wat via die Johannesburgse Aandelebeurs by die Uniegebou eindig.
Volg Nuus24 op Twitter
- Volksblad