Jeugliga in provinsie wil Media24 boikot
2011-09-02 08:00
Kaapstad. – Die ANC-jeugliga se provinsiale strukture in Limpopo wil Media24 boikot omdat die maatskappy se publikasies die ANC glo te gereeld kritiseer.
Luidens ’n verklaring van die jeugliga word die ANC en sy leiers gemiddeld 37 keer per dag deur Media24 se publikasies aangeval en word die maatskappy gebruik as wapen om die ANC en sy leiers te teiken.
Dus, só meen Frans Moswane, die jeugliga se Limpopo-voorsitter, moet nie net die koerante en tydskrifte geboikot word wat Media24 uitgee nie, maar sommer al die skoolhandboeke ook.
In reaksie het die menseregtegroep Media Monitoring Africa (MMA) in ’n verklaring gesê hy wonder wat die bron vir die jeugliga se bewering van 37 aanvalle per dag is.
William Bird van MMA het uitgewys dat die verloorders in so ’n boikot nie enige welvarende aandeelhouers in Media24 sal wees nie, maar gewone Suid-Afrikaners wat nie meer die maatskappy se produkte sal lees nie.
Bird het die MMA se voortgesette kommer uitgespreek oor die venynige aard van aanvalle op die Suid-Afrikaanse media, insluitend die fisieke aanvalle op joernaliste tydens die optogte ter ondersteuning van Julius Malema, die jeugliga se leier, hierdie week in Johannesburg.
Media24 het nie kommentaar gelewer nie.
Volg Nuus24 op Twitter.
- Beeld