Jeugliga-hoë se dood betreur
2011-12-28 19:05
Johannesburg – Vusi Mhlongo, 'n lid van die ANC-jeugliga se nasionale uitvoerende komitee, is op Kersaand in 'n hospitaal in Tongaat, KwaZulu-Natal, dood, het die jeugliga Woensdag gesê.
Mhlongo, wat deur die jeugliga beskryf is as "'n sagte ekonomiese vryheidsvegter", het altyd aan die kleinste besonderhede aandag gegee en het die verhouding tussen teorie en praktyk goed verstaan, het Floyd Shivambu, woordvoerder van die jeugliga, in 'n verklaring gesê.
"Daar was nie 'n enkele massabyeenkoms of veldtog van die ANC-jeugliga onder die leierskap van kameraad Vusi as organiseerder wat misluk het of wat uitgestel is weens swak voorbereiding nie."
Mhlongo was ook deel van die ANC se afvaardiging wat die Soedannese People's Liberation Movement gehelp het om suksesvol te mobiliseer vir die onafhanklikheidwording van Suid-Soedan, het Shivambu bygevoeg.
"Dít het hy nie vir eie gewin gedoen nie, maar uit 'n besef dat ware vryheid vir die onderdrukte mense van die Afrika-kontinent onlosmaaklik verbind is aan Afrika se algehele politieke, sosiale en ekonomiese bevryding."
Die verklaring het nie Mhlongo se ouderdom of die oorsaak van sy dood duidelik gemaak nie.
– Volg Nuus24 op Twitter.
- SAPA
