Jeugliga gaan nie lê nie
2011-08-22 07:02
Kaapstad – Die ANC se jeugliga is dalk gewond, maar hy gaan nie lê nie.
Verder is hy oortuig die aanklagte teen sy president en nasionale woordvoerder is polities gemotiveerd en dat dit nie werklik oor beweerde swak dissipline gaan nie.
Die jeugliga het Sondagaand – ná ’n spesiale vergadering van die organisasie se nasionale uitvoerende komitee (NUK) – ’n versigtig bewoorde verklaring uitgereik waarin hy hom aan die regerende party se dissipline onderwerp, maar wat terselfdertyd duidelik maak hy gaan nie ’n tree terug gee nie.
Maggie Moonsamy, jeugliga-woordvoerder, het ook by navraag bevestig daar word voortgegaan met planne om landwye optogte na belangrike ekonomiese instellings– soos die Johannesburgse effektebeurs – te hou. “Ons gaan nie afwyk van ons beleidsplanne net omdat ons ook nou hierby (die tugprosedure teen Julius Malema, ANC-jeugleier, en Floyd Shivambu, nasionale woordvoerder) betrokke is nie. Iemand moet leiding aan die jeug gee, en ons sal voortgaan om dit te doen.”
Dit blyk verder dié optogte gaan gebruik word om massa-steun vir Malema en Shivambu te werf.
“Die jeugliga bevestig sy totale steun aan sy leierskap en is oortuig die aanklagte is politieke kwessies waaroor interne gesprek gevoer moet word,” lui die verklaring.
Daarin voeg die jeugliga in dieselfde asem by hy sal hom neerlê by die ANC se dissipline “en is altyd gereed om polities te skakel met die partyleierskap oor enige kwessie wat sal help om die ideale van die Vryheidsmanifes ten volle te verwesenlik”.
Die ANC se eie spesiale vergadering van sy NUK het ook Sondag ten einde geloop. Hoewel daar geen amptelike kommunikasie was nie, word verneem kwessies van dissipline het die tweedaagse koukus oorheers. Pres. Jacob Zuma is glo besig om die leisels stewig vas te vat, amper ’n jaar nadat hy Malema en die jeugliga op die party se nasionale hoofraadsvergadering in Durban ook berispe het.
Geen partywoordvoerder of ampsdraer was vir amptelike kommentaar bereikbaar nie.
Die jeugliga sê in sy verklaring hy gaan ’n dringende vergadering met die ANC se topses aanvra om die “politieke kwessies” wat wrywing tussen die moederparty en die jeugliga veroorsaak, te bespreek.
“Dié kwessies kon bespreek gewees het voordat besluit is om aanklagte teen die jeugliga se leierskap in te dien. Die spesiale NUK-vergadering het die organisasie se vasbeslotenheid om onverpoos en vreesloos om ekonomiese vryheid te veg, bevestig. Dít sluit in die nasionalisering van myne, onteiening sonder vergoeding en gratis onderwys vir almal.”
Dis nog onduidelik wie Malema en Shivambu by hul tugverhoor – wat aanstaande Dinsdag en Woensdag in Luthuli-huis gehou sal word – gaan verteenwoordig.
Intussen dui alles daarop dat Malema se probleme aan die vererger is. Kol. McIntosh Polela, die Valke se woordvoerder, het Vrydag bevestig die handelsmisdaadeenheid het al twee weke gelede ’n besluit oor ’n amptelike ondersoek na Malema se geldsake geneem.
Dié ondersoek is reeds in ’n gevorderde stadium en die ondersoekspan het al verskeie kere na Limpopo gereis om bewysstukke in te samel. Dit volg op ’n klagte wat AfriForum oor Malema se familietrust by die polisie aanhangig gemaak het.
Volg Nuus24 op Twitter.
- Volksblad