Jeugliga-afgevaardigdes verontagsaam leierskap
2010-06-06 16:31
Johannesburg - Honderde afgevaardigdes van die ANC-jeugliga uit die Oos-Kaap het Saterdag die jeugliga se nasionale werkskomitee verontagsaam deur in Port Elizabeth, pleks van Oos-Londen, vir 'n provinsiale konferensie op te daag, het die Sunday Times berig.
Die komitee, wat die jeugliga se hoogste uitvoerende liggaam is, het Vrydag ooreengekom dat die Orient-teater in Oos-Londen die beste plek sou wees om die konferensie aan te bied.
Die liga se provinsiële komitee het egter besluit op Coega Village in Port Elizabeth.
"Nog nooit in die geskiedenis van die ANC of die jeugliga het 'n mens al ooit gehoor die nasionale werkskomitee meng in met iets soos 'n plek vir 'n provinsiale konferensie nie," het die provinsiale sekretaris, Mlibo Qoboshiane, gesê.
"Ons het in hulle teenwoordigheid [algemene sekretaris Vuyiswa Tulelo en tessourier-generaal Pule Mabe] besluit dat Coega die beste plek is om hierdie konferensie te hou. Hulle het vir ons gesê ons moet die plek bespreek en betaal, en dis wat ons gedoen het."
Die provinsie is op die oomblik verdeel tussen ondersteuners van Julius Malema en sy onderleier, Andile Lungisa, wat na verwagting volgende jaar sal probeer om leierskap van die jeugliga oor te neem.
- SAPA