Jeugfees rafel uit
2010-12-15 07:02
Die Burger
Pretoria - Die Wêreldjeugfees het Dinsdag erg uitgerafel met sprekers wat nie opgedaag het nie, besprekingsessies wat nooit plaasgevind het nie en talle afgevaardigdes wat buite rondgedrentel het.
Die reëlings was so swak dat ’n Wes-Kaapse afgevaardigde gedreig het om Wes-Kaapse deelname aan die fees te onttrek weens die swak reëlings rakende kos, verblyf en vervoer.
Dié fees, waarvoor R69miljoen begroot is (waarvan R40miljoen deur die Loteryraad bewillig is) en waaraan sowat 10000 jong mense van 100 lande deelneem, moes Dinsdag om 09:00 begin.
Verskeie lokale van die Tshwane Events Centre waar besprekingsessies moes plaasvind, het leeg gestaan terwyl duisende afgevaardigdes op die gras ontspan het. Ander het sokker en speletjies gespeel om die tyd te verwyl.
Talle kon nie kos kry nie omdat die organiseerders nie koskoepons aan hulle uitgedeel het nie.
Talle afgevaardigdes was laat omdat hulle weens swak vervoerreëlings treine en taxi’s moes gebruik om by die feesterrein te kom.
Gedurende die oggend is oor die luidsprekerstelsel aangekondig dat die formele program stiptelik om 14:00 sou begin, maar twee uur later het daar nog steeds niks gebeur nie.
Nie een van die vooraanstaande politici wat volgens die program sou optree – Winnie Madikizela-Mandela, Fikile Mbalula, minister van sport, Tokyo Sexwale, minister van menslike nedersettings, en Lindiwe Sisulu, minister van verdediging – het opgedaag nie.
Siyabonga Magadla, woordvoerder van die nasionale jeugontwikkelingsagentskap (NYDA) wat die fees reël, het gesê hoewel dié politici op die program as sprekers aangedui is, het nie een bevestig dat hulle sal optree nie. Die besprekings sou sonder hulle voortgaan.
Buite die besprekingslokale is flink sake gedoen. T-hemde van die SAKP en die ANC is vir onderskeidelik R100 en R150 verkoop.
Van die “wêreldbrandpunte” wat wel aandag gekry het, is Wes-Sahara se stryd om onafhanklikheid van Marokko, die Palestynse vryheidstryd teen Israel, en Kuba se stryd teen die ekonomiese blokkade van die VSA.
In een sessie het ’n Noord-Koreaanse spreker sy verontwaardiging uitgespreek omdat die massamedia van die “imperialistiese Weste” die kommunisme aan fascisme gelykstel.
In ’n ander sessie het ’n verteenwoordiger van Zanu-PF verduidelik dat sy land hom nie langer aan Europa steur nie en nou na lande soos China en Indië kyk vir handelsbande.
- Die Burger