Jeugdiges wat boer vermoor nie in hof
2011-08-03 11:53
Johannesburg – Twee jeugdiges van onderskeidelik 16- en 17-jarige ouderdom wat verdink word van die moord op 'n boer van Reitz sal nie Woensdag in dié dorp se landdroshof verskyn soos verwag nie, het RSG berig.
Die saak spruit uit die dood Maandag van 'n boer, die 55-jarige Thinus Uitenweerde, wat in 'n vlak graf op sy plaas begrawe is.
Die seuns is Maandag, dieselfde dag van die aanval, in Petsana in hegtenis geneem, het sers. Mmako Mophireng gesê.
Die nuwe kinderwet wat verlede jaar in werking getree het, maak daarvoor voorsiening dat minderjariges eers aan 'n voorlopige ondersoek onderwerp moet word.
'n Regsverteenwoordiger, maatskaplike werker, die ondersoekbeampte en familielede moet ook teenwoordig wees tydens die ondersoek.
'n Landdros sal Woensdagmiddag 'n besluit neem ná voorleggings deur die onderskeie partye gemaak is.
Een van die mans wat in hegtenis geneem is het glo ‘n paar dae gelede op die plaas gewerk.
Uitenweede se seun het die polisie glo Maandag gekontak nadat ‘n vreemdeling een van die telefoonoproepe wat hy na sy ouers se huis gemaak het, geantwoord het.
Met die polisie se aankoms was Uitenweerde se vrou Magriet en sy ma, Isabel, vasgebind, maar daar was geen teken van die boer nie.
Beeld het Woensdag berig dat Magriet en Isabel 20 uur gewag het voordat die polisie opgedaag het.
Die polisie het Uitenweerde se lyk in ‘n vlak graf op die plaas gevind.
Volgens berigte het die familie se hond om die vlak graf rondgesnuffel. Dit het die polisie se aandag getrek en hulle gelei na waar Uitenweerde se lyk begrawe was.
Die jeugdiges bly in aanhouding.
– Volg Nuus24 op Twitter