Jeugdiges vas vir skaapwagter se moord
2012-12-12 16:19
Johannesburg – Twee jeugdiges, 'n 18-jarige en 'n 19-jarige, is in hegtenis geneem ná hulle 'n skaapwagter in Kwaaiman, Ngcwanguba, doodgesteek het, het die Oos-Kaapse polisie gesê.
Die skaapwagter was Dinsdagaand op pad huis toe, toe drie jeugdiges hom twee keer gesteek het, en op die vlug geslaan het. Hy is is op die toneel dood, het maj. Zamukulungisa Jozana gesê.
Die polisie is deur ooggetuies in kennis gestel. Twee van die jeugdiges is later Dinsdag by hulle huise in Ngcwanguba in hegtenis geneem. Die ander een is nog op vrye voet.
Die twee wat in hegtenis geneem is, het bebloede klere gedra.
"Ons het ook twee messe in hulle besit gevind," het Jozana gesê.
Die motief vir die aanval is nie bekend nie. Die twee sal na verwagting Donderdag in die Kwaaiman-hof verskyn op aanklagte van moord.
– Volg Nuus24 op Twitter.
- SAPA
