Jeug moet stryd om gelykheid lei, sê SAKP
2012-06-17 14:51
Johannesburg – Die Suid-Afrikaanse Kommunistiese Party (SAKP) het Sondag 'n beroep op jongmense in Suid-Afrika gedoen om meer betrokke te wees by aktivisme om die drome van die jeug wat aan die 1976-opstand in Soweto deelgeneem het, 'n werklikheid te maak.
"Die jeug van vandag kom te staan voor spesifieke uitdagings wat hulle die hoof moet bied terwyl hulle geskiedenis maak," het die party Sondag in 'n verklaring gesê.
"Armoede, werkloosheid en ongelykheid wêreldwyd en in Suid-Afrika spesifiek het kommerwekkende vlakke bereik."
Die SAKP het Sondag op die jeug 'n beroep gedoen om in opstand te kom teen kapitalisme, armoede en ongelykheid.
"Die jeug moet gehelp word om 'n betekenisvolle rol in die ekonomie te speel," het die party gesê.
Onderwys moet gratis en verpligtend wees.
"Ons moet ons jeug oplei en ondersteun om deel te neem en 'n ekonomie te bou... wat die behoeftes van mense en die gemeenskap bo winste stel."
Die party het gesê Suid-Afrika se jeug moet, net soos in Palestina, Swaziland, Kuba, en Sirië, in opstand kom.
"Die teen-imperialistiese en teen-kapitalistiese aard van ons stryd moet verdiep word en die jeug moet dié stryd lei."
– Volg Nuus24 op Twitter.
- SAPA
