Jel stuit nie MIV
2009-12-15 09:50
Elsabé Brits
Kaapstad - Die groot hoop wat geplaas is op ’n vaginale jel om die oordrag van MIV/vigs te keer, het ’n knou gekry.
Die Microbicide Development Programme (MDP) het gister aangekondig die finale fase van dié vier jaar lange kliniese studie het getoon die jel is nie suksesvol om die oordrag van die virus te stuit nie.
Die wêreld het groot hoop op die jel geplaas, veral omdat dit vroue bemagtig het en moontlik ’n uitkoms kon gee om self beheer te neem van hul seksuele veiligheid deur die aanwending daarvan. Die produk PRO 2000 (met ’n konsentrasie van 0,5%) is wel veilig om te gebruik, maar gee nie beter beskerming teen die virus as die plasebo nie.
Die studie van vier jaar lank is die grootste in sy soort en het 9 404 vroue van Suid-Afrika, Tanzanië, Uganda en Zambië betrek.
Volgens die International Partnership for Microbicides (IPM) gaan die werk voort en beteken die feit dat soveel vroue vir so lank aan die studie deelgeneem het dat hulle die mag wil hê om hulself te beskerm.
Die nuwe generasie jel sal langer werk en sal antiretrovirale middels bevat. Werk hieraan het reeds begin. Antiretrovirale middels werk deur spesifiek die virus te teiken deur óf te verhoed dat dit die gesonde sel binnegaan óf te verhoed dat dit vermeerder wanneer dit in die sel is.
In Suid-Afrika is onder meer Caprisa reeds besig met dié navorsing sodat beter en langer beskerming aan vroue gegee kan word.
Nuwe jels sal net een keer per dag aangewend hoef te word, terwyl vaginale ringe wat die antiretrovirale middels bevat maandeliks vervang sal word.
- Die Burger