Jansen 'skaam' vir SA
2013-01-21 09:29
Johannesburg – Prof. Jonathan Jansen, kanselier van die Universiteit van die Vrystaat, het aan eerstejaarstudente gesê hy is skaam vir Suid-Afrika, het Beeld Maandag berig.
“Ek is skaam vir Suid-Afrika. Dit is ‘n absolute skande dat jy matriek met ‘n slaagsyfer van 30% kan deurkom. [Die minister van onderwys, Angie] Motshekga, maak ‘n reuse-fout deur te spog oor die matriek-slaagsyfer. Dit is ‘n absolute skande,” het Jansen gesê.
Hy het studente gewaarsku om hom nie te nader met “hartseer stories en verskonings soos liefdesprobleme” nie, aangesien hulle hul tyd sal mors.
“Ek maak altyd tyd vir studente, maar voordat jy ‘n afspraak maak, kyk my sekretaresse na jou akademiese rekord. As jy ‘n vak gedruip het, gaan ek nie my tyd met jou mors nie,” het hy aan 4 000 eerstejaarstudente gesê.
Jansen het gesê hierdie jaar se eerstejaarstudente is die slimste in die universiteit se geskiedenis van 109 jaar.
“Julle is almal my kinders en ouers moet streng wees. As jy ‘n klip optel en dit op kampus gooi, sal ek jou skors. As jy iemand slaan, sal ek jou skors. As jy kwaad is, sal ek jou skors. As jy ‘n vrou sonder respek hanteer, sal ek jou skors,” het hy gewaarsku.
“Jy kan arm wees, maar jy kan ordentlik optree, het my ma altyd gesê.”
– Volg Nuus24 op Twitter
- SAPA
