Jan Alleman kry lig in kragtonnel
2010-02-25 06:51
Cobus Claassen
Pretoria - Huishoudings met ’n hoë kragverbruik sal vanjaar reeds baie meer vir hul krag moet betaal as die gemiddelde verhoging van 24,8% wat die Nasionale Energiereguleerder (Nersa) gister aangekondig het.
Daarenteen sal die tariewe vir huishoudings met ’n lae kragverbruik vanjaar selfs met 10,5% daal weens probleme met die toepassing van die nuwe tariefstruktuur.
In die algemeen sal elektrisiteitspryse vir huishoudings en sake-ondernemings oor die volgende drie jaar verdubbel.
Kleiner huishoudings sal egter volgens glyskale heelwat minder as die gemiddelde verhoging betaal.
Die riglyne vir Eskom se verhoging vanjaar (2010-’11) is 24,8%, 25,8% vir 2011-’12 en 25,9% vir 2012-’13.
Nersa se voorgestelde riglyn vir die verhoging in elektrisiteit vir plaaslike owerhede vir huishoudings vir dieselfde jare is 15,33%, 16,03% en 16,16%.
Ferdi Kruger, ’n spesialis in elektrisiteitsregulering by Nersa, het gister gesê die voorgestelde verhogings vir munisipaliteite kan gesien word as ’n “regstelling” vir die 34%-verhoging wat die meeste munisipaliteite verlede jaar op aanbeveling van die nasionale tesourie goedgekeur het.
Volgens Kruger word die “ware kostestruktuur van munisipaliteite” ook in die verhoging van 15,33% weerspieël.
“Die 34% was te hoog en moes eerder in die omgewing van 23% gewees het.
“Die idee is dat dit binne die volgende drie jaar reggestel word,” het Kruger verduidelik.
Volgens Nersa kan ’n huishouding wat maandeliks ongeveer 800 KWh verbruik volgens voorlopige berekeninge van 1 Julie tussen 8,5% en 10% meer betaal vir elektrisiteit wat deur ’n munisipaliteit verskaf word.
Volgens Kruger word rofweg die helfte van die land se residensiële verbruikers deur munisipaliteite bedien.
’n Gemiddelde huishouding is gister as voorbeeld uitgebeeld as ’n gesin van vier met een geiser, ’n elektriese stoof sonder ’n swembad en ander luukse elektroniese toerusting.
Residensiële verbruikers wat maandeliks ongeveer 800 KWh verbruik en krag direk by Eskom koop, kan volgens ’n glyskaal wat Nersa bekend gemaak het, verwag om van 1 Julie tussen 14% en 18% meer op te dok.
Residensiële Eskom-verbruikers wat egter maandeliks meer as 2 000 kWh verbruik, kan weens ’n stewige styging in die glyskaal verwag om tot soveel as 35% meer op te dok.
Cecilia Khuzwayo, Nersa se voorsitter, het gesê die munisipaliteite wat nie verlede jaar ’n 34%-verhoging in werking gestel het nie, kan by Nersa aansoek doen vir ’n aangepaste verhoging.
Munisipaliteite moet hulle prysstrukture, wat ’n glyskaal sal behels, voor 30 April aan Nersa voorlê.
- Die Burger