Jagter kry R50 milj. ná inhegtenisneming
2013-02-18 11:21
Johannesburg – Die Pretoriase hooggeregshof het R50 miljoen aan 'n professionele jagter toegeken nadat hy verkeerdelik in hegtenis geneem is, het The Star Maandag berig.
Jaco Scott kon weens sy inhegtenisneming nie voortgaan met 'n geskeduleerde olifantjag nie.
Scott is R75 000 in skadevergoeding toegeken vir sy inhegtenisneming en aanhouding en R577 610 wat hy aan 'n Amerikaanse entiteit, Field and Stream, betaal het om jagters van die Verenigde State te werf vir jagekspedisies.
Die hof het ook R49,2 miljoen aan sy maatskappy, Scotto, toegeken vir die verlies van inkomste oor die volgende 25 jaar omdat Field and Stream besluit het om nooit weer van Scott se dienste gebruik te maak nie.
Die koerant het verder berig dat die jagparty op 10 Junie 2004 in Suid-Afrika aangekom het ná 'n ooreekoms tussen Scotto en Field and Stream.
Scott is 'n dag voor die jagekspedisie, wat in Zimbabwe sou plaasvind, in verband met 'n onverwante voorval in hegtenis geneem. Die berig het nie gesê hoekom hy in hegtenis geneem is nie.
– Volg Nuus24 op Twitter
- SAPA
