Jagluiperd byt kurator erg aan been, arm
2011-11-07 09:07
Bloemfontein - ’n Werknemer van die Bloemfonteinse dieretuin het ’n noue ontkoming gehad toe die jagluiperd Gracy hom aangeval het.
Rudi Vertue (35), kurator van karnivore by die dieretuin, was Vrydag besig om twee jong jagluiperds na ’n nuwe kamp te verskuif. Die diere, wat taamlik mak is, was glo baie opgewonde oor die verskuiwing.
Toe Vertue aandag aan ’n seerplek aan die wyfie Gracy se bek wou gee, het sy hom bespring en baie erg aan sy been en albei arms gebyt, het sy ma, Leonore, van Cradock aan Wilna de Klerk vertel.
Hoewel hy haar die eerste keer kon afskud, het sy hom weer bespring. Een van die werkers het haar met ’n groot gesukkel van hom afgetrek.
“Rudi het gesê hy is baie verbaas oor die wyfie se reaksie, aangesien die katte redelik mak is en soms, as hy en sy helpers in die hokke werk, teen hulle kom skuur. Ons is net dankbaar dat nie een van Rudi se ligamente of are afgebyt is nie,” het mev. Vertue gister gesê.
Amanda Appelgryn, woordvoerder van die Mediclinic Bloemfontein, het gesê Virtue se wonde is in die teater geheg en hy sal moontlik Maandag ontslaan word.
Vertue is nie die enigste pasiënt wat in die Mediclinic Bloemfontein vir wildekat-wonde behandel word nie.
Albert Bojane (41), veldwagter van die Kgalagadi-oorgrenspark, wat verlede week in die park deur ’n leeu aangeval is, sterk ook in dié hopsitaal aan.
Appelgryn het Sondag gesê dit is net in Suid-Afrika waar so iets sal gebeur.
“Gedurende die Wêreldbekersokkertoernooi in 2010 het besoekers uit Duitsland my gevra of die hospitaal spesiaal vir die toernooi gebou is. Toe antwoord ek grappenderwys en sê ja, ons moes net eers die leeus en ander wilde diere wegjaag.”
Sy het gesê dit sal nie in Switserland of Doebai gebeur waar die groep ook hospitale bedryf nie.
Bojane, wie se toestand aanvanklik versleg het, is in ’n stabiele toestand in die waakeenheid. Hy is intussen van die asemhalingstoestel gehaal.
Qondile Khedama, woordvoerder van die Mangaung- metropolitaanse raad, en Lawrence Letshokgohla, ’n beampte van die dieretuin, het geweier dat Volksblad Gracy afneem. Khedama het ook geweier dat met Vertue ’n onderhoud gevoer word.
– Volg Nuus24 op Twitter
- Volksblad