Jacob Zuma in kerktwis
2010-02-26 06:35
Liesl Peyper
Kaapstad - Die debat oor ’n morele kode vir Suid-Afrika wat deur pres. Jacob Zuma geïnisieer is, gaan bes moontlik gedryf word deur ’n intergeloofsgroep wat ’n sterk verbintenis met die ANC het, maar waarin nie een van die land se vernaamste godsdiensforums dien nie.
In kerkkringe is dié verwikkeling bestempel as ’n ernstige gevaar vir die betrekkinge tussen kerk en staat.
Die Burger het gister op goeie gesag verneem dat die National Interfaith Leadership Council (NILC), wat verlede jaar deur past. Ray McCauley van die Rhema-kerk byeengeroep is, gevra kan word om Zuma se voorgestelde gesprekke oor moraliteit te koördineer.
Die NILC is in Julie verlede jaar gestig as ’n organisasie wat uit meer as 20 senior leiers van verskeie geloofsformasies bestaan.
By nadere ondersoek blyk dit egter dat nie een van die vernaamste godsdiensforums – soos die Suid-Afrikaanse Raad van Kerke (SARK), die Moslem Juridiese Raad (MJR) en die Joodse Raad van Afgevaardigdes – genader is om by die NILC aan te sluit nie.
’n Ingeligte wat op voorwaarde van anonimiteit gepraat het, het aan Die Burger gesê die NILC is in wese ’n skynorganisasie wat hom voordoen as ’n liggaam wat namens alle godsdiensgroepe praat.
“Maar dit is nié die geval nie. Van die grootste kerke – neem byvoorbeeld die Sionistekerk (ZCC) van Polokwane – is nie deel van die NILC nie.”
Die SARK het verlede jaar, nadat dit rugbaar geword het dat die NILC met Zuma vergader het, in ’n verklaring gesê die SARK is nooit genader oor die sameroeping van die NILC nie.
“Dit wil voorkom of die NILC die werk van die Nasionale Godsdiensleiersforum (NRLF) dupliseer.”
Die Burger het betroubaar verneem dat die NILC juis gestig is omdat die SARK nie gehoor wou gee aan versoeke van die ANC om ’n alliansievennoot van die regerende party te word nie.
Dit blyk voorts dat die NILC wel ’n sterk verbintenis met die ANC het.
Die Mail & Guardian het vroeër berig dat die ANC-hoofsweep, dr. Mathole Motshekga, en nog twee ANC-LP’s – mnr. Ebrahim Rasool, oudpremier van die Wes-Kaap, en past. Ntabiseng Khunou, ’n ANC-LP van die Vrystaat – lede van die NILC is.
Khunou is ook dié organisasie se amptelike woordvoerder.
Die NILC het vroeër vandeesmaand vir Zuma in die bresse getree toe dit rugbaar geword het dat hy ’n buite-egtelike kind het. In ’n verklaring het dié organisasie gevra dat Suid-Afrikaners Zuma “vergewe en aanbeweeg”.
Die Burger het ook vasgestel dat die NILC se mediaverklarings deur Motshekga se kantoor uitgestuur is.
- Die Burger