Jackson Mthembu is 'n 'dronkaard' – EV
2012-09-27 18:08
Johannesburg – Jackson Mthembu, woordvoerder van die ANC, was “dronk” toe hy die geskorste leier van die ANC-jeugliga, Julius Malema, gekritiseer het, het die Ekonomiese Vryheidsvegters (EV) Donderdag gesê.
“Die dronkaard het so ver gegaan om pres, Julius Malema ‘n ‘bedreiging en ‘n monster’ te noem op ‘n baie kinderagtige en aangeklamde wyse,” het die EV in ‘n verklaring gesê.
Mthembu het Malema Maandag in ‘n onderhoud op die TV-kanaal eNCA beledig.
“Kan jy jouself indink as Julius Malema ooit president van die land word. O, liewe Heer, mag daardie dag nooit in ons of ons kinders se leeftyd gebeur nie,” het Mthembu aan die nuuskanaal gesê.
Die EV het Mthembu daarvan beskuldig dat hy Malema kritiseer om ‘n sameswering teen die geskorste jeugleier, wat deur pres. Jacob Zuma gelei word, weg te steek.
“Die dronkaard het op ‘n swak wyse probeer om die realiteit te ontken dat Jacob Zuma agter die staat se pogings is om pres. Julius Malema in hegtenis te neem in ‘n poging om politieke verdeeldheid te onderdruk,” het die organisasie gesê.
Mthembu is in 2010 in Kaapstad vir dronkbestuur in hegtenis geneem. Hy het skuld erken in die Wynberg-landdroshof en is ‘n boete van R12 000 opgelê.
– Volg Nuus24 op Twitter
- SAPA
