‘JZ het niks om weg te steek'
2010-03-09 07:26
Lizel Steenkamp
Kaapstad. – Pres. Jacob Zuma het niks om weg te steek nie.
Dit is hoekom die presidensie nie die bohaai rondom Zuma se klaarblyklike weiering om sy belange ingevolge wetgewing te verklaar, begryp nie.
“Dis nie asof die Sunday Independent die president uitgevang het nie. Ons het dit openlik erken en gesê wat die redes daarvoor is,” het Vincent Magwenya, Zuma se woordvoerder, gister aangevoer.
“Daar is geen rede om op en af te spring en goedkoop politieke punte daaruit te wil wen nie.”
Die Sunday Independent het eergister berig Zuma het byna ’n jaar ná sy inhuldiging steeds nie sy belange verklaar nie.
Die Wet op die Etiek van Lede van die Uitvoerende Gesag van 1998 vereis dat lede van die kabinet, onder wie die president en adjunkministers, premiers en LUR’e, hul belange binne 60 dae ná hul aanstelling moet verklaar.
Die DA het gistermiddag ’n amptelike versoek aan adv. Thulisile Madonsela, openbare beskermer, gestuur om Zuma te ondersoek.
“Selfs al verklaar die president sy belange binne die volgende week, het hy steeds die wet oortree deur eers tien maande te wag,” het Athol Trollip van die DA gister gesê.
- Beeld