Jý hoes vir hoës se weelde-lewe
2011-08-28 09:30
Jeanne van der Merwe en Jacques Dommisse, Media24-ondersoeke
Kaapstad – Belastingbetalers moes vanjaar minstens R46 miljoen opdok vir spoghuise vir kieskeurige ministers en ander politici sodat hulle in weelde in Kaapstad kan leef.
Boonop is dié huise teen pryse hoër as die markwaarde gekoop.
Die polisie se spesiale ondersoekeenheid bekyk nou dié transaksies as deel van ’n omvattende ondersoek na ’n omstrede eiendomsprogram binne die departement van openbare werke (DOW).
In die parlement is die afgelope week bevestig dat die DOW sedert Mei 2009 minstens R183 miljoen bestee het aan huise vir ministers en hul adjunkte in Kaapstad en Pretoria.
Rapport kan vandag verdere besonderhede oor die weelderige leefstyl van die betrokke ANC-hoës onthul.
Die DOW het die omstrede huistransaksies ingevolge sy sogenaamde “prestige-portefeulje” bevestig, maar geweier om te sê watter spoghuis aan watter minister of adjunkminister toegeken is.
Rapport het vasgestel dat me. Nomaindia Mfeketo, adjunkspeaker van die parlement, die sleutels vir ’n Toskaanse herehuis in Delairestraat, in die eksklusiewe voorstad Van Riebeeckshof in Bellville, ontvang het.
Mfeketo het egter ’n ander huis skaars 9 km daarvandaan.
Haar nuwe Toskaanse huis het onder meer ’n lugversorgde slaapkamer, ’n ontwerper-kombuis, ’n buite-onthaalgebied, ’n swembad en ses motorhuise.
Die staat het R8 miljoen betaal vir die huis, maar volgens die Stad Kaapstad se waardasierol is dit sowat R7 miljoen werd.
Drie ander eiendomme in die pas ontwikkelde Van Riebeeckshof is ook deur die DOW gekoop teen pryse veel hoër as die munisipale waardasies.
Een eiendom, in Welgelegenstraat 5, is vir R7 miljoen gekoop – 154% méér as die munisipale waardasie van R2 229 900.
Rekords van die titelaktes wys die huistransaksies wat die staat in Bellville aangegaan het, is onder die hoogste pryse wat vir eiendomme in Van Riebeeckshof en Oude Westhof betaal is.
Luidens ’n markontleding van die sewe eiendomme is hulle altesame R37,4 miljoen werd, wat aansienlik minder is as die R46 miljoen wat die staat daarvoor betaal het.
Ses van die sewe eiendomme is deur Pam Golding Properties se Welgemoed-tak aan die staat verkoop. Die eiendomsagentskap wou nie kommentaar lewer nie.
“Die keuse van hierdie eiendomme is uitsluitlik gegrond op die toestand en ouderdom van die huise,” het Thami Mchunu, DOW-woordvoerder, gesê. “Dit is nuutgeboude huise hierdie wat nie enige strukturele veranderinge nodig gehad het nie.”
Op ’n vraag oor die verskil tussen die kooppryse en die munisipale waardasies het Mchunu gesê die departement het sy eie eiendomsevaluasies gedoen, en ook voorleggings aan die grondsake-raad gedoen.
“Die kooppryse was binne die goedgekeurde prysreeks wat deur die raad vasgestel is.”
Die DA-parlementslid Erik Marais het in die parlement gesê dit is “vreemd en onaanvaarbaar” dat Mfeketo ’n spoghuis kry, terwyl sy reeds eiendom daar naby besit.
Hy sê huise ter waarde van sowat R3 miljoen elk sou meer gepas gewees het.
“Die ANC verwys gereeld na die armstes van die armes, maar hier word uitspattige huise van gemiddeld R6,5 miljoen elk deur die staat aangeskaf.”
Danny Oliphant, die Kaapse bestuurder van die DOW se prestige-portefeulje, sê die ministeriële behuisingskompleks op die Groote Schuur-landgoed kan nie al die kabinetslede huisves nie. Sommige van die eiendomme daar word tans opgeknap.
– Volg Nuus24 op Twitter
- Rapport