Jý gaan betaal vir swak bestuur
2009-11-27 05:17
Marelize Barnard
Kaapstad - Die belastingbetalers van die Moederstad, wat reeds baie sal moet opdok weens Eskom se beoogde skerp verhoogde tariewe, sal ook miljarde rande moet opdok vir die nuwe Kaapstad-stadion en die verbeterde openbare vervoerplanne vir die metropool.
Om dié duur rekeninge te betaal, word die Kaapse stadsvaders gedwing om die moontlikheid van bykomende petrol- en parkeerheffings te ondersoek waarvoor Kaapse motoriste die sak sal moet skud.
Die Kaapstad-stadion het in dié stadium ’n prysetiket van R4,4 miljard en die beperkte Fase 1A van die snelvervoer-busdiens een van R2,3 miljard. Dan is daar nog die paaie wat vol slaggate is wat reggemaak moet word.
Die geldelike verknorsing waarin die stadsraad gedompel is met projekte wat op nasionale vlak geïnisieer is, maar nou die Kaapse stadsraad op hol het om die geld bymekaar te skraap, is gister in ’n marathon-stadsraadsvergadering bespreek.
Dan Plato, burgemeester, het gesê hy moet erken dat die stadsraad nie die beloofde geld van die nasionale regering vir die grootskaalse kapitale projekte kry nie.
“Dit staan soos ’n paal bo water. Dit is ’n groot verantwoordelikheid vir die stadsraad. Sonder om klippe te gooi, wil ek sê die nasionale regering hét al betalings gedoen en ons kan net hoop verdere bydraes sal gemaak word,” het Plato gesê.
Hy het gesê die snelvervoerdiens is ’n dramatiese hoë uitgawe.
“Die feit is as ons nie die nasionale regering kan oorreed om die stadsraad te help nie, sal ons nie die geld bymekaar kan kry om die geïntegreerde snelvervoerdiens te ondersteun nie.”
Op skriftelike vrae van André Fourie, VF+-raadslid, oor die uitgawes vir die stadion en snelvervoerdiens is geantwoord dat daar planne is.
Dit behels onder meer om deur kaartjieverkope en naamregte vir die Wêreldbeker-sokkerwedstryde ’n inkomste van R386 miljoen te genereer. Dít is nodig vir die delging van ’n tussentydse lening van R660 miljoen wat die stadsraad aangegaan het om die stadion te bou.
Ian Neilson, onderburgemeester, het gesê die probleem met die tekort van R274 miljoen wat daarna steeds uitstaande sal wees, “word nie net só gelos nie”.
- Die Burger