Inwoners sit dwelm-wenke in kerk se kollektebord

2012-12-10 12:12

Johannesburg – Vreesbevange inwoners van ’n dwelm-geteisterde buurt het met ‘n blink plan vorendag gekom om inligting oor dwelmhandelaars aan die polisie verskaf; deur hul anonieme wenke in hul kerk se kollektebordjie te sit.

“Jy kan nêrens in Wentworth [‘n buurt in Durban] gaan sonder om dwelmhandel en -verslawing teë te kom nie,” het eerw. Cierigh Samaai van die Inter-church Social Action Alliance Campaign (Isaac) aan Beeld gesê.

Kerke en die sambreelliggaam Communities Building Credible Ownership (CBCO) het dié inisiatief in samewerking met kol. Deon Singh, nuwe bevelvoerder van die Wentworth-polisiekantoor, van stapel gestuur.

Volgens Samaai is ’n standaardvorm ontwerp waarop mense inligting kan invul en dit dan in ’n koevertjie kan sit wat nes dié vir kerkgangers se tiendes lyk sodat niemand sal weet dat hulle inligting oor dwelmhandel verskaf het nie. Dié inligting word dan aan die polisie oorhandig.

“Die dwelmprobleem in die buurt is só erg dat mense volgens een polisielid selfs van Newcastle kom om dwelms te koop.”

Die dagblad berig die dwelmhandelaars betaal mense se huur en hul kinders se skoolgeld. In ruil daarvoor word die woonstelle gebruik om dwelms te berg of van te verkoop.

Volg Nuus24 op Twitter

- SAPA