Inwoners op hol oor polisie-skietery
2011-09-19 07:00
Kimberley – Vier mans is hier agter tralies ná ’n wilde skietery in die woonbuurt Florianville.
Die polisie word ná dié drama Vrydagnag beskuldig dat hulle roekeloos en onnodig hier geskiet en onskuldige inwoners se lewe in gevaar gestel het, maar die polisie sê daar is eerste op hulle geskiet toe hulle na beweerde dwelmhandel ondersoek ingestel het.
Kapt. Sergio Kock, polisiewoordvoerder, sê die polisie het ’n wenk ontvang dat dwelms onder ’n boom op die hoek van Congregation- en Beechstraat gesmous word.
“Toe die taktiese eenheid omstreeks 03:10 daar opgedaag het, het ons die groepie mans gewaarsku en gesê hulle moet hande in die lug steek. Toe skiet hulle eerste op die polisie. Die polisie het teruggeskiet.
“Daar was drie voertuie op die toneel; ’n wit en ’n rooi golf en ’n swart Polo. Die persoon in die swart motor het weggejaag.
“Ons het vier mans op aanklagte van poging tot moord in hegtenis geneem omdat hulle na ons geskiet het. Hulle is tans in die polisieselle in Transvaalweg. Ons soek nog na hul vuurwapen.”
Twee van die voertuie is beskadig.
Die eienaar van die swart Polo, Romano Africa, sê hy was op pad huis toe, toe hy by die mans gestop het om te gesels. “Ek was nog in my kar, toe die polisie skiet. Toe jaag ek weg. Daar is drie koeëls deur my motor. Die een band is ook raakgeskiet en my agterruit en regteragtervenster is stukkend. Die polisie moet nog een koeël uit die motor haal.”
Inwoners sê hulle is in die oggendure deur koeëls wat teen hul huise geklap het, uit hul slaap geruk.
Denzil Kock sê hy het van sy huis af gesien hoe die polisie skielik uit die gras uit “op die mans wat ’n verjaardagpartyjie om ’n vuurtjie in die veld gehou het”, toegeslaan het.
Toe hy die skote gehoor en uit die huis gekom het, het hy gesien hoe die mans plat op die grond lê. “Die polisie was op hulle en het hulle aangerand. Ek dink een van die voertuie het oor van die mans se koppe gery. Die polisie het Sondagoggend teruggekom en al die patroondoppies opgetel en weggeneem.”
’n Gesinslid van een van die verdagtes, Shanaaz Rajah, en haar dogter, Wadayha, het foto’s van hom in die selle gaan neem. “Hy is erg aangerand en moes ure op doktersbehandeling wag. Ons weet nie wat aangaan nie.”
Sukayana Jansen sê hulle het wakker geword van die skote.
“Die polisie het op ons geskree en beveel om binne ons huis te bly. Ek het gesien hoe hardloop hulle tussen huise agter die mans aan om te skiet.”
Gregory Bosch sê hy het hom amper doodgeskrik toe drie koeëls sy huis tref.
“As een skoot 10 cm hoër was, het dit deur die glas gegaan in die kamer waar my dogter, wat nege maande swanger is, slaap.”
Kock sê as die verdagtes aangerand is, moet hulle klagte teen die polisie indien.
Volg Nuus24 op Twitter.
- Volksblad