Inwoners oorval polisie 'om bende te beskerm'

2012-12-10 13:00

Kaapstad – Twee polisiebeamptes is beseer nadat hulle ‘n oproep oor ‘n skietery in Bishop Lavis op die Kaapse Vlakte opgevolg het, het die SAPD in ‘n verklaring gesê.

Luidens die verklaring is die polisielede Sondagaand omstreeks 17:00 in Kreefgat, Bishop Lavis, deur ‘n oproerige groep oorval toe hulle die voorval wou ondersoek.

Die groep het na bewering die polisievoertuig se vensters uitgeslaan en die lede aangerand terwyl hulle nog in die voertuig gesit het.

Lt.kol. André Traut sê die polisielede kon nie daarin slaag om die gemeenskapslede te ontwapen nie, en het 'n man, Jerome Brown (34), in die proses doodgeskiet.

Hy sê die polisie se onafhanklike ondersoek-direktoraat (Opod) sal die man se dood ondersoek.

Albei polisiebeamptes is in die hospitaal opgeneem, terwyl ander lede na die gebied ontbied is om orde te bewerkstellig.

Traut sê niemand is tot dusver in verband met die aanval op die polisiebeamptes in hegtenis geneem nie. Ondersoeke duur egter voort.

Volgens die polisiewoordvoerder het die gemeenskap die SAPD doelbewus geïntimideer om bendelede te beskerm.

Volg Nuus24 op Twitter

- Nuus24