Inwoners brand hul enigste bib af

2010-02-10 11:15

Betogers kyk na ’n makker wat op die vensterbank van die nedersetting se brandende biblioteek staan Felix Dlangamandla, Beeld).

André Damons

Johannesburg - Oproerige inwoners van die Siyathemba-township buite Balfour in Mpumalanga het Dinsdag hul enigste biblioteek afgebrand.

Dit is die derde agtereenvolgende dag dat inwoners in hul opstand teen swak dienslewering, die gebrek aan werkgeleenthede en buitelanders in hul midde chaos veroorsaak.

Skaars 10 minute nadat sers. Sam Tshabalala aan Beeld gesê het hulle is in beheer van die situasie en bly dit monitor, het sowat 1 000 mense na dié biblioteek opgeruk, dit geplunder en toe aan die brand gesteek. Polisielede, wat laat op die toneel opgedaag het, het die media vir die plundery verkwalik.

Inwoners en die polisie, wat met rubberkoeëls en donshael losgebrand het, het deur die loop van die dag gebots.

Kartonplakkate met handgeverfde boodskappe het oproeriges se frustrasies en pleidooie verkondig. “President, trek jou ritssluiter op en kom na Dipaleseng,” het een pres. Jacob Zuma genooi om dié gebied te besoek.

Fikiru Tekalinge, ’n Ethiopiër, het gesê hy en sy familie kom nie terug Balfour toe nie. “Hoe kan ek teruggaan? Daar is niks vir my en my familie om na terug te gaan nie en die polisie het geen beskerming aan ons gegee nie. Dit is gevaarlik en ek vrees vir my familie se lewens,” sê hy. Tekalinge en sy vrou, Selame, het na Johannesburg gevlug.

Luidens ’n verklaring van Amnestie Internasionaal is sowat 134 buitelanders verjaag.

Volgens Simphiwe Kunene, woordvoerder van die provinsiale departement van samewerkende regering en tradisionele sake, sou Norman Mokoena, LUR vir samewerkende regering en tradisionele sake, me. Sibongile Manana, LUR vir gemeenskapsveiligheid en skakeling, sowel as Jabu Mahlangu, LUR vir ekonomiese ontwikkeling, omgewingsake en toerisme, laat gister die gebied besoek het. Die drie het egter by die munisipale kantore in die dorp vergader.

Die drama het Sondagaand begin toe inwoners uit ontevredenheid met dienslewering en ’n plaaslike myn se beweerde verbreekte beloftes oor werkgeleenthede strate versper en buitebande gebrand het. Talle munisipale geboue is sedertdien geplunder of aan die brand gesteek.

Ethiopiërs, Indiërs en Paki­stani’s se winkels is ook geplunder en beskadig.

Dawie Mostert, woordvoerder van die myn, het gister gesê die myn verskaf werk aan sowat 50% van die plaaslike inwoners en het al R3,2 miljoen aan vaardigheidsontwikkeling en leerlingskapprogramme in die omgewing bestee.

Mokoena het gisteraand op ’n mediakonferensie gesê daar sit mense met “agendas” agter die geweldpleging wat die inwoners se regmatige griewe “gekaap” het.

- Beeld