Internasionale stemme klink op teen omstrede mediawet
2010-08-13 09:13
Die Burger
Kaapstad - Die Internasionale Persinstituut (IPI) het pres. Jacob Zuma gevra om seker te maak persvryheid in Suid-Afrika word beskerm.
Die ANC se oënskynlike planne om persvryheid in te perk, is ook Donderdag deur ’n struggle-veteraan gekritiseer.Dit kom nadat Zuma Woensdag in Port Elizabeth gesê het ’n mediatribunaal, wat volgende maand op die party se algemene raadsvergadering bespreek word, ís nodig omdat joernaliste soms oorboord gaan.
Alison Bethel-McKenzie, waarnemende direkteur van die IPI, en dr. Mamphela Ramphele, akademikus en ’n voormalige swart bewussynsleier, is die nuutste stemme wat kritiek lewer op die voorgestelde Wet op die Beskerming van Inligting en die tribunaal.
Kritici meen beide sal swaar beperkings op die vloei van inligting na die publiek plaas en persvryheid drasties inkort.
Benewens die IPI se brief en berigte deur oorsese nuusagentskappe en in die Wall Street Journal, is vandeesweek se vergadering van die parlementêre ad hoc-komitee wat die inligtingswet oorweeg ook bygewoon deur waarnemers van die Amerikaanse konsulaat.
Bethel-McKenzie het gesê redakteurs en joernaliste oor die hele wêreld is “diep bekommerd” oor onlangse verwikkelinge wat die onafhanklikheid en lewenskragtigheid van die plaaslike pers sal bedreig. Die IPI doen gevolglik ’n beroep op Zuma om die wet aan te pas of terug te trek en planne vir ’n tribunaal te staak.
“Ons glo nie ’n tribunaal sal onafhanklik wees nie. Dit sal in der waarheid op regeringsoorsig van die media neerkom, wat onaanvaarbaar is.”
Ramphele het Donderdag by die Universiteit van Kaapstad gesê die huidige politieke klimaat “is onbelowend, indien nie eenvoudig somber nie”. Die “gevaarlike en vae” mediaplanne is seker die dringendste uitdaging waardeur Suid-Afrika se jong demokrasie tans in die gesig gestaar word. “Dit lyk of die tipe Suid-Afrika wat (hulle) wil hê een is met beperkte openbare toegang tot inligting...(Die wet) kan ’n sluier van onsigbaarheid aan korruptes gee.”
Intussen is die vergadering waar dr. Siyabonga Cwele, minister van staatsveiligheid, LP’s vandag oor die wet te woord sou staan, op sy aandrang uitgestel.
Brian Dube, Cwele se woordvoerder, het gesê hy het meer tyd nodig om oor die voorleggings te besin.
Volg Nuus24 op Twitter
- Die Burger