Interdik teen stakers toegestaan
2011-08-18 17:55
Johannesburg – ‘n Interdik is aan die Stad Kaapstad toegestaan wat stakende munisipale werkers daarvan weerhoed om nie-stakende werknemers en werknemers in noodsaaklike dienste te intimideer, het die Stad Donderdag gesê.
Demetri Qually, lid van die burgemeesterskomitee vir korporatiewe dienste, het gesê die bevel is Woensdagoggend deur die arbeidshof toegestaan in verband met drie kwessies.
“Die eerste kwessie het verband gehou met die instruksie aan Samwu-lede om nie aan intimidasie of geweld deel te neem nie,” het hy gesê.
“Die tweede was dat werknemers in noodsaaklike dienste na hul poste moet terugkeer en die derde was dat Samwu-werkers gehoor moet gee aan die reëls van betogings en stakings.”
Honderde Samwu-lede het vroeër vandeesweek straatverkopers se goedere geplunder, plastiekdromme aan die brand gesteek en motorvensters gebreek in die Kaapse middestad.
Die staking, wat ‘n loonverhoging van 18 persent vir Samwu-lede eis, het Maandag begin. Die Suid-Afrikaanse Vereniging vir Plaaslike Regerings (Salga) bied ses persent aan.
- Volg Nuus24 op Twitter
- SAPA