Inligtingswet ‘vol slaggate en bedreig persvryheid’
2010-05-23 05:01
Rajaa Azzakani, Die Burger
Kaapstad – Die regering kan sterk teenkanting van mediagroepe verwag oor sy beplande Wetsontwerp op die Beskerming van Inligting wat joernaliste tot 25 jaar tronk toe kan stuur vir die besit van geklassifiseerde staatsinligting.
Dié wetsontwerp is boonop vol slaggate vir die behoud van persvryheid, het Dario Milo, mediaregkenner van die prokureursfirma Webber Wentzel, Vrydag gesê.
“Bowenal sal die wetsontwerp strafregtelike oortredings skep in terme van die bekendmaking van geklassifiseerde inligting wat daarmee verband hou, wat ’n kwessie van staatsveiligheid is, sonder om aan die media ’n verdediging van ‘in die openbare belang’ te gee.”
Milo voel verder dat die drempel wat gestel word om staatsinligting te klassifiseer veels te laag is. “Dit gee klassifiseerders die reg om dokumente geheim te hou op grond van spekulatiewe nadeel oor wye terme, soos nasionale belang.
“Die wet sal in sy huidige formaat ’n kil uitwerking op ondersoekende verslaggewing hê.”
Ingevolge die wetsontwerp kan die media swaar gestraf word vir die besit en bekendmaking van geklassifiseerde inligting.
Die nuwe wet sal ’n beperking van 20 jaar plaas op geklassifiseerde inligting en inligting wat vir dekades lank ontoeganklik was, sal vir die publiek oopgestel word.
Die Suid-Afrikaanse Redakteursforum (Sanef) het reeds aangedui dat hy by aanstaande maand se openbare sittings sy ongelukkigheid oor sekere bepalings in die wetsontwerp gaan opper.
Volgens Thabo Leshilo, voorsitter van Sanef se mediavryheidskomitee, is die begrip “nasionale belang” in die wetsontwerp problematies en veels te ruim.
Hy het die hoop uitgespreek dat dit in die parlement bespreek sal word.
- Die Burger