'Inligtingswet sal nie korrupsie kan oopvlek'
2011-06-02 07:07
Kaapstad - Die openbare beskermer (OB), adv. Thuli Madonsela, het haar stem by die reeks kritici van die voorgenome inligtingswet gevoeg.
Volgens haar sal die Wet op die Beskerming van Inligting in sy huidige vorm verhoed dat fluitjieblasers na vore kom met inligting wat korrupsie aan die kaak sal stel.
Madonsela was Woensdag die spreker by ’n gespreksforum wat die Skool vir Openbare Leierskap aan die Universiteit Stellenbosch se Sakeskool gehou het.
In vraetyd is sy gevra of sy dink die voorgenome inligtingswet sal ’n nadelige uitwerking op haar kantoor se werkswyse hê.
Sy het geantwoord daar is reeds bepaalde wysigings in die wetsontwerp aangebring wat die openbare beskermer sal magtig om toegang tot geklassifiseerde inligting te bekom.
“Maar die doeltreffendheid van my kantoor berus op die publiek se vermoë om toegang tot inligting te hê,” het sy benadruk.
Madonsela het in haar toespraak veral klem gelê op die noodsaaklikheid van deursigtigheid en verantwoordbaarheid in ’n demokrasie.
Die kantoor van die openbare beskermer stel ondersoek in wanneer klagtes oor onbehoorlike gedrag, wanadministrasie en wangedrag aan haar gerapporteer word. “Maar daar moet ook remediërende optrede wees – anders word die negatiewe kringloop nooit verbreek nie,” het sy gesê.
Madonsela het daarop gesinspeel dat nie alle staatsinstellings hul samewerking gee wanneer haar kantoor hulle vir inligting nader nie.
“’n Staatsamptenaar het onlangs gedink haar struggle-getuigskrifte sou haar van ’n ondersoek van my kantoor vrywaar. Dit is nié die geval nie.”
Sedert die begin van haar ampstermyn in 2009 het Madonsela verskeie kere haar stem dik gemaak oor wangedrag in die staatsdiens.
Sy het nie gehuiwer om pres. Jacob Zuma te kritiseer weens sy versuim om sy belange te verklaar soos wat die gedragskode vereis nie. Verder het sy bevind dat genl. Bheki Cele, nasionale polisiehoof, hom skuldig gemaak het aan onregmatige optrede en wanbestuur wat betref die huur van ’n gebou vir die nuwe polisiehoofkwartier in Pretoria.
- Die Burger