Info-wet vertraag
2011-11-16 09:07
Kaapstad – ’n IVP-parlementslid kan die aanvaarding van die omstrede Wetsontwerp op die Beskerming van Inligting vandag vertraag met die indiening van 123 voorgestelde wysigings daaraan.
Dr. Mario Ambrosini het die wysigings met die ondersteuning van die VF+ op die ordelys van die Nasionale Vergadering (NV) geplaas.
Daar is wydlopende kommer dat die wetsontwerp, soos dit tans staan, dit vir joernaliste en lede van die publiek byna onmoontlik sal maak om inligting wat as geheime inligting verklaar word om wandade toe te smeer, openbaar te maak sodat korrupsie voorkom kan word.
Ambrosini het Dinsdag gesê sy doelwit is om die ad hoc-komitee wat die wetsontwerp moes behandel kans te gee om dit verder te verbeter.
Gisteraand het senior parlementêre ringkoppe van die ANC vergader en dit het gelyk of Ambrosini se onkonvensionele taktiek suksesvol kan wees – moontlik slegs as vertraging, en nie dat hy enige krediet van die ANC of DA daarvoor sou kry nie.
Aangesien parlementêre reël 255 bepaal dat wysigings aan die ordelys deur die NV bespreek moet word voordat daar oor die res van ’n wetsontwerp gestem kan word, kan Ambrosini se voorstelle die parlementêre proses só vertraag dat die ANC teen gisteraand ’n nuwe taktiek oorweeg het.
Eerstens lyk dit of die debat oor die wetsontwerp wel Woensdagmiddag gaan plaasvind sodat die parlementslede mekaar goed in die hare kan vlieg, maar dat die stemmery uitgestel sal word.
Die verwagting is dat Max Sisulu, speaker van die NV, dan kan versoek dat die ad hoc-komitee weer aangestel word om die wetsontwerp en Ambrosini se voorgestelde wysigings te bespreek.
Die verwagting is voorts dat ’n sperdatum gestel sal word wanneer die komitee sy werk moet afhandel.
ANC-LP’s was Dinsdag baie geïrriteerd deur Ambrosini se taktiek, maar niemand was meer uitgesproke as Dene Smuts, DA-LP, nie.
Sy het gesê hoewel die DA die wetsontwerp sal teenstaan, veral weens die bepalings oor die besit en bekendmaking van inligting wat geheim verklaar is, asook weens die afwesigheid van ’n verweer dat dit in die openbare belang is dat sulke inligting bekend gemaak word, probeer Ambrosini net aandag trek.
“Sy gedrag beteken nie dat die komitee die wetsontwerp sal verander nie. Dis ’n truuk sonder substansie,” het sy gesê.
Ambrosini het gesê hy het die grootste respek vir Smuts, maar dat sy moet fokus op haar taak om die wetsontwerp te verbeter eerder as om woedend te reageer.
– Volg Nuus24 op Twitter
- Die Burger