Info-wet: ANC kan sittings met sy lede laai
2012-01-31 08:00
Kaapstad. – Sterk aanduidings bestaan dat kunsmatige ANC-meerderhede in die gehore by openbare voorleggings oor die Wetsontwerp op die Beskerming van Staatsinligting geskep gaan word.
Inligting wat Die Burger bekom het, dui daarop dat groot getalle van die mense wat die voorleggings landwyd gaan bywoon, per bus aangery sal word.
Waar die busse stilhou en wie opgelaai word, sal dus ’n groot invloed op die samestelling van die gehore vir die openbare voorleggings hê, en ANC-politici het ’n bepalende inset daaroor, blyk uit navrae.
Die voorleggings begin vanoggend in die sportkompleks van die Kaapse voorstad Gugulethu en in George.
Nosimo Ntwanambi, ANC-hoofsweep in die Nasionale Raad van Provinsies, het by navraag bevestig die provinsiale swepe in die Nasionale Raad van Provinsies reël die busvervoer en die passasiers is “diegene wat gereël het om die voorleggingsessies by te woon”.
Die oorgrote meerderheid swepe is ANC-lede. Van die provinsiale swepe behoort net een (die Wes-Kaap) nie aan die ANC nie. Cope het ook ’n party-sweep.
Ntwanambi het gesê sy meen nie die ANC-lede wat provinsiale swepe is, sal die samestelling van die gehoor manipuleer nie.
“Hulle is daar om die provinsies se belange te verteenwoordig, nie die ANC nie,” het sy gesê, maar kort daarna bevestig dat die swepe ook die ANC se belange verteenwoordig.
Ntwanambi het aggressief gereageer op ’n vraag waarom die Kaapstadse sitting plaasvind in die N2-korridor, die enigste deel van die stad met ’n ANC-meerderheid.
Sy het gesê dis omdat die res van die stad se inwoners genoeg geld het om na Gugulethu te reis, maar die mense van Gugulethu nie genoeg het om na die res van die stad te reis nie.
– Volg Nuus24 op Twitter
- Beeld