Inbrekers slaan toe op polisiehoof se huis
2011-06-25 07:29
Johannesburg – Inbrekers het glo Vrydagaand op lt.genl. Mzwandile Petros, polisiehoof in Gauteng, se huis in Bryanston toegeslaan, berig Eyewitness News.
Petros se vrou was ten tyde van die voorval, wat omstreeks 20:00 plaasgevind het, in die huis, maar is ongedeerd.
Sy het die diewe gehoor inbreek en alarm gemaak.
Die groep mans het glo oor 'n muur geklim en die houtpaneel van die voordeur gebreek, berig Sapa.
Hulle het 'n plasma-televisie gebuit voor hulle gevlug het.
Petros wou nie kommentaar lewer oor die voorval nie, en het navrae na sy woordvoerder verwys.
Meer as 20 motors was Saterdagoggend buite die luukse huis parkeer. Die polisie in Gauteng het gesê hy sal later 'n verklaring uitreik.
Petros is uit sy vorige posisie as polisiehoof van die Wes-Kaap na Gauteng verplaas, het Nuus24 vroeër berig.
Hy is in September verlede jaar in Gauteng aangestel.
– Volg Nuus24 op Twitter