Inbrekers skiet man in huis dood
2010-08-08 17:04
Johannesburg – ‘n 45-jarige man is doodgeskiet tydens ‘n inbraak by sy huis in Blairgowrie, het die polisie in Gauteng Sondag gesê.
“Hy is vermoor vir ‘n skootrekenaar, selfoon en beursie,” het kapt. Cynthia Magoai, polisiewoordvoerder, gesê.
Vier verdagtes het na bewering Saterdagaand toegang tot die huis verkry.
Die man, sy vrou en kinders het reeds geslaap toe hy wakker geword het van ‘n geraas in die kombuis.
“Die man het ondersoek gaan instel en die rowers in die huis betrap. Hy het probeer om die paniekknoppie te druk, toe een van die verdagtes hom in die bors geskiet het,” het Magoai gesê.
Die verdagtes het met die gesteelde items op die vlug geslaan.
Met paramedici se aankoms op die toneel was die slagoffer se vrou besig om noodhulp op haar man toe te pas.
“Die nooddienswerkers het by die vrou oorgeneem en vir sowat 30 minute lank probeer om die slagoffer se lewe te red. Hy het egter op die toneel aan sy beserings beswyk,” het Chris Botha, Netcare 911-woordvoerder, Sondag gesê.
Niemand anders is tydens die voorval beseer nie.
Geen verdagtes is nog in hegtenis geneem nie.
Volg Nuus24 op Twitter.
- SAPA