Inbreker vat pad in duikpak
2010-12-31 07:28
Die Burger
Kaapstad – Die vreemde kombinasie van ’n hond en ’n groen duikpak was nie genoeg om ’n inbreker in Lakeside te laat ontsnap nie.
Dié 28-jarige man van Lotusrivier het gister met sy hond as medepligtige by ’n huis in Leicesterstraat ingebreek en homself daar met ’n groen duikpak uitgerus.
In sy klaarblyklike opgewondenheid oor dié vonds het hy egter van sy hond vergeet toe hy later die hasepad gekies het.
Volgens Allan Dillon, eienaar van die sekerheidsmaatskappy Mountain Men, het die inbraak net ná 11:00 gebeur.
Die verdagte het na bewering by die motorhuis ingesluip en onder meer ’n batterylaaier, gereedskap en die groen duikpak gesteel.
Hy het die duikpak oor sy klere aangetrek.
Die eienaar van die huis, mnr. David Bulmer, het die skelm egter in die motorhuis betrap en hom agternagesit.
Die verdagte het in die rigting van Boyesweg gehardloop. Volgens Dillon het beamptes in die berg gesien hoe die verdagte by ’n ander huis in die buurt wegkruip.
Beamptes van Mountain Men en die polisie het egter kort daarna op die dief in die duikpak toegesak en hom in hegtenis geneem.
Hy sal na verwagting Maandag in die Muizenberg-landdroshof op aanklagte van huisbraak en diefstal verskyn, het kapt. Stephen Knapp, ’n polisiewoordvoerder, gesê.
Bulmer het aan Yunus Mohamed gesê dit is die tweede inbraak vandeesmaand by sy huis.
Die hond het op die toneel agtergebly nadat sy eienaar deur die polisie aangekeer is.
Dit was teen druktyd nie bekend wat hierna van die hond geword het nie.
Volg Nuus24 op Twitter.
- Die Burger