Inbreker moor glo ná vrylating
2010-07-24 11:32
Durban. – ’n Veroordeelde inbreker wat in Junie uit die tronk vrygelaat is, is saam met twee ander verdagtes in hegtenis geneem in verband met die gru-moord op ’n bejaarde egpaar ’n week gelede aan die KwaZulu-Natalse suidkus.
Die 23-jarige verdagte is vroeër tronk toe gestuur weens ’n inbraak in Hibberdene, waar Christopher Early (69) en sy vrou, Jennifer (62), verlede Donderdag in hul huis in die woongebied Woodgrange vermoor is.
’n Span speurders van Port Shepstone se eenheid teen georganiseerde misdaad het die drie verdagtes eergister omstreeks 16:00 by die Silver Hill-kampong van ’n groep suikerrietplase in hegtenis geneem.
Volgens lt.kol. Zandra Hechter, polisiewoordvoerder, is die kampong sowat 12 km van die Early’s se huis.
Een van die verdagtes, ’n 33-jarige man, werk op een van die plase.
Die polisie het die Early’s se .22- en .38 Special-rewolwer, asook die oorledenes se twee selfone en verskeie ander huisraad by die verdagtes gekry.
Mev. Early is glo met die egpaar se eie .22-rewolwer doodgeskiet. Mnr. Early is volgens aanduidings met ’n kapmes doodgeslaan nadat hy vermoedelik die rowers in die huis verras het waar hulle sy vrou aangehou het.
Die polisie stel ondersoek in of die verdagtes met enige ander rooftogte verbind kan word.
Die drie mans sal na verwagting oormôre in Hibberdene in die hof verskyn.
- Beeld