Ilse Naudé op 98 oorlede
2011-12-31 10:20
Johannesburg – Ilse Naudé, vrou van die legendariese teoloog dr. Beyers Naudé (98), is Donderdag aan hartversaking oorlede.
Dr. Naudé is die een wat altyd opgehemel is, maar as dit nie vir sy vrou as steunpilaar was nie, sou dié veteraan-kampvegter teen apartheid nie naastenby soveel bereik het nie, het mnr. Johann Naudé, hul oudste seun, gister gesê.
Mev. Naudé het twee weke gelede ’n heupoperasie ondergaan en het sedertdien gedurig van moegheid gekla.
Sy is eergistermiddag in die St. Michaels-aftreeoord in Johannesburg oorlede.
“Sy het die laaste ruk meestal geslaap en gesê sy is baie moeg.
“Ons het geweet dit is haar hart wat nie meer kon nie,” het haar skoondogter Rita gesê.
Die egpaar was 64 jaar lank getroud toe dr. Naudé in 2004 op 89-jarige ouderdom oorlede is.
Op haar 95ste verjaardag het mev. Naudé gesê sy mis haar man en “wil nou huis toe gaan” om by hom te wees.
Die twee het mekaar ontmoet by die stapklub van die Universiteit Stellenbosch waar hy teologie gestudeer het en sy in wiskunde uitgeblink het.
Op dr. Naudé se tagtigste verjaardagparty het oudpres. Nelson Mandela ’n toespraak gelewer en net lof gehad vir die egpaar.
“Sy krag is van liggaam en van gees en dit is dié soort krag en sy ontembare gees wat die boosheid van apartheid oorwin het en hom ’n held gemaak het vir ons mense.
“As iemand my vra hoe ’n nuwe Suid-Afrikaner moet wees, sal ek sê: Kyk na Beyers en sy vrou, Ilse.”
In sy outobiografie, My Land van Hoop, het dr. Naudé sy vrou die krediet daarvoor gegee dat die saadjie van nierassigheid by hom ontkiem het.
Sy het op die Morawiese sendingstasie Genadendal naby Caledon grootgeword en was dus daaraan gewoond om saam met bruin mense in die kerk te arbei.
In die boek verwyt dr. Naudé homself dat hy, om chauvinistiese redes, sy vrou nie ingelig gehou het oor sy groeiende vervreemding van die apartheidsgedagte, veral ná die Cottesloe-kerkeberaad van 1960, nie. Hy betuig herhaaldelik sy waardering vir haar rotsvaste steun.
Twee keer het hulle ernstig oor belangrike kwessies verskil. Die eerste was toe hy dit oorweeg het om die land te verlaat en sy vir hom gesê het sy sal hom nie volg nie. Die tweede keer was toe hy die NG Kerk verlaat het en sy ’n lidmaat gebly het.
Mev. Naudé word oorleef deur vier kinders, vier kleinkinders en drie agterkleinkinders. ’n Gedenkdiens word op 7 Januarie om 12:00 in die NG kerk Aasvoëlkop in Northcliff, Johannesburg, gehou.