Idols-deelnemer inderhaas na hospitaal gejaag
2010-08-15 09:00
Johannesburg - ’n Ambulans en paramedici wat met ’n deelnemer hospitaal toe jaag, voorspel groot drama in vanaand se Idols-episode.
“Die
kykers moet onthou dat die teaterrondes wat tans uitgesaai word, seker
vir die meeste spanning in die hele kompetisie sorg. Die impak daarvan
op die deelnemers is enorm,” sê Ingrid Engelbrecht van M-Net.
Almal skrik dan ook groot as daar inderhaas met ’n deelnemer hospitaal toe gejaag moet word.
“Ons het dadelik besef hoe ernstig die geval is, vandaar almal se flinke optrede,” sê Engelbrecht.
Kykers moet maar tot 17:30 wag om op M-Net te sien presies wie dit is en wat met die deelnemer gebeur.
Die
eerste van die drie teaterrondes is Dinsdagaand tydens ’n halfuur lange
episode uitgesaai – 39 deelnemers het toe die trekpas gekry.
Vanaand word dag twee in die teater uitgesaai. Die deelnemers kies groepe en moet dan ’n liedjie vir die beoordelaars voorberei.
Baie van die deelnemers sukkel egter tot ná middernag om by ’n groep ingeskakel te word.
Ná die vertoning word nóg aspirantsangers huis toe gestuur.
Op dag drie, wat ook vanaand uitgesaai word, kies elke deelnemer ’n maat om ’n duet te sing.
Kykers sal Dinsdagaand sien wie die oorblywende deelnemers is vir wie hulle van volgende Sondag af kan stem.
“As
’n mens na die talent en die gehalte van die produksie kyk, dan dink ek
hierdie een is ons beste Idols-reeks nóg,” sê Engelbrecht.
“Dis ook nie duidelik hoeveel mense elke keer tot die volgende ronde deurdring nie, so dit sorg vir ’n lekker verrassing.”
- Rapport